असोजबाट फेरि साताको पाँच दिन मात्रै सेयर कारोबार गर्ने निर्णय नेपाल स्टक एक्सचेञ्ज (नेप्से) को सञ्चालक समितिले गरेको छ।
हाल शनिबार बाहेक साताको छ दिन सेयर कारोबार भइरहेको छ। गत असार १ गतेदेखि लागु हुने गरी सेयर बजार साताको छ दिन नै खुल्न थालेको हो।
अहिलेको व्यवस्था अनुसार आइतबारदेखि बिहीबारसम्म बिहान ११ बजेदेखि दिउँसो ३ बजेसम्म र शुक्रबार बिहान ११ बजेदेखि दिउँसो १ बजेसम्म बजार खुला हुँदै आएको छ।
सेयर खरिद बिक्री केन्द्रबाट बि.सं. २०५० मा नेपाल स्टक एक्सचेञ्जको रूपमा रूपान्तरण भएसँगै सेयर बजार पाँच दिन खुला रहने गरेको थियो। तर गत जेठमा सरकारले पेट्रोलियम पदार्थको बचत गर्न परीक्षणको लागि भन्दै शनिबार र आइतबार सार्वजनिक बिदा दिइयो।
नेप्सेले पनि सरकारको निर्णयसँगै आइतबार बिदा दिएर शुक्रबार नियमित कारोबार गरिरहेको थियो।
पछि सरकारले आइतबार दिएको बिदा खारेजको घोषणा गरेसँगै नेप्सेले आइतबार समेत गरी साताको छ दिन नै नियमित सेयर कारोबार सञ्चालन गर्दै आएको हो।
