नेपाल टेलिकमले फोरजी/एलटीई सेवा देशभर विस्तारका लागि ठेक्का सम्झौता गरेको छ। टेलिकमले देशभर फोरजी विस्तारका लागि दुई चिनियाँ कम्पनीसँग सम्झौता गरेको हो।
फोरजी/एलटीई सेवा विस्तारका लागि आवश्यक कोर नेटवर्क र रेडियो एक्सेस नेटवर्क (र्यान) को लागि चिनियाँ कम्पनी जेडटीई र सीसीएसआई हङकङसँग सम्झौता भएको टेलिकमले जानकारी दिएको छ।
यस सम्बन्धी छुट्टाछुट्टै सम्झौता पत्रमा नेपाल टेलिकमको तर्फबाट प्रबन्ध निर्देशक डिल्लीराम अधिकारी र जेडटीई तथा सीसीएसआईका प्रतिनिधिले हस्ताक्षर गरेका छन्।
नेपालभर ६५ लाख क्षमताको फोरजी/एलटीई विस्तारका लागि एउटा कोर नेटवर्क र दुई वटा र्यान नेटवर्क तयार गरिने सम्झौता भएको छ।
र्यान नेटवर्क अन्तर्गत नेटवर्क १ र नेटवर्क २ मार्फत सातै प्रदेशमा सेवा विस्तार गरिने छ । सम्झौता पश्चात् एक वर्ष भित्रमा परियोजना सम्पन्न हुने छ ।
यसमा कोर नेटवर्क विस्तारको जिममा जेटईले पाएको छ। उले टेन्डरमा १ अर्ब ६५ करोड ७३ लाख रुपैयाँ कबोल गरेको थियो।
त्यस्तै चिनियाँ कम्पनी हुवावेको साहयक कम्पनीसीसीएसआई हङकङले रेडियो एक्सेस नेटवर्क (¥यान)को जिम्मा पाएको छ। उसले दुई प्याकेजकै जिम्मा पाएको हो। पहिलो प्याकेजबाट ८ अर्ब ७५ करोड २६ लाख र दोस्रो प्याकेजको ८ अर्ब ३९ करोड ३१ लाख कबोल गरेको थियो।
टेलिकमले यो पुरै आयोजना निर्माण गर्न १८ अर्ब ८० करोड रुपैयाँ खर्चिने भएको छ।
नेपाल टेलिकमले मुलुक मै पहिलो पटक मिति २०७३ पौष १७ गते काठमाडौँ उपत्यका र पोखरामा फोरजी/एलटीई सेवा सञ्चालन गरेको थियो । देशभर यो सेवा विस्तार भए पश्चात टुजी, थ्रिजी र फोरजी नेटवर्कलाई ओभरलेको रुपमा सञ्चालनगरेको थियो।
टेलिकमले फोरजी सेवा विस्तारका लागि २०७४ को कात्तिकमा टेन्डर आव्हान गरेको थियो। त्यसपछि पुसमा टेन्डर खोलिए पनि अख्तियार दुरुपयोग अनुसन्धान आयोगले नौ महिनासम्म फाइल नियन्त्रणमा लिएर काम अघि नबढाउन निर्देशन दिएको थियो।
गएको मंसिरमा अख्तियारले संचार मन्त्रालयलाई पत्र लेख्दै प्रक्रिया अघि बढाउन निर्देशन दिएको र सोहीअनुसार ठेक्का सम्झौताको काम अघि नेपाल टेलिकमले अघि बढाइएको थियो।
आधुनिक प्रविधिसहितको पूर्वाधार निर्माण गरेर त्यसमै फाइभ जी अपग्रेड मिल्नेगरी काम गरिने टेलिकमका प्रबन्ध निर्देशक डिल्ली अधिकारीले जानकारी दिए।
ताेकिएको मितिभित्रै काम सम्पन हुने उनले जानकारी दिए।
‘हामीले गर्नुपर्ने सहजीकरण पनि गर्ने छौं, उनीहरुले गर्ने पनि गर्ने छन् तर काम भनेकै समयमा हुनेछ नत्र जरिबाना हुन्छ’ उनले भने।
सकाम गर्ने कम्पनीले अबको ६ महिनाभित्र देशका २५ वटा सहरमा फोरजी सेवा संचालनको काम गरिसक्नुपर्ने व्यवस्था गरिएको उनले जानकारी दिए। उनका अनुसार बाँकी छ महिनामा देशभर फोरजी सेवा र पाँचवटा सहरमा फाइभजीको परीक्षण सेवा पनि उपलब्ध हुने छ।
‘उनीहरुले निशुल्क फाइभ जी सेवा परीक्षणका लागि उपलब्ध गराउने छन्’ अधिकारीले भने।