गण्डकी प्रदेशका प्रदेश प्रमुख पृथ्वीमान गुरूङले प्रदेश सरकारमार्फत् जनताको अपेक्षा अनुसारको धेरै काम हुन बाँकी रहेको बताएका छन्।
बुधबार गण्डकी प्रदेश सरकारको चौथो वार्षिकोत्सव समारोहलाई सम्बोधन गर्दै प्रदेश प्रमुख गुरूङले जनताको अपेक्षा अनुसारको काम प्रदेश सरकारमार्फत् हुनै बाँकी रहेको बताएका हुन्। यद्यपि, प्रदेश सरकारमार्फत् ऐन, कानुनको निर्माण हुनुका साथै विकास र समृद्धिको कामको भने सुरूआत भएको उनले बताए।
उनले भने, ‘प्रदेश सरकारमार्फत् भएका कार्यको प्रदेशका स्थापनाका प्रारम्भिक खाका तयार भए पनि त्यो पूर्ण हुन सकेको छैन। जनताको जुन चाहना र लक्ष्य अनुसार प्रदेशको स्थापना भयो। त्यो लक्ष्य हासिल गर्न हामीले प्रदेश सरकारमार्फत् धेरै कार्य गर्न बाँकी छ। प्रदेश सरकारका माध्यमबाट सञ्चालन हुने ऐन, कानुन निर्माणका साथै जनताका घरदैलोमा प्रदेश सरकारका माध्यमबाट हुने विकास र समृद्धिका कार्यको राम्रो सुरूआत भएको छ।’
उनले संघीयताको संस्थागत विकासका लागि प्रदेश र स्थानीय तहको जग बलियो हुनुपर्ने बताए। प्राप्त उपलब्धिको रक्षाका लागि सबै पक्ष एकजुट हुन उनले आग्रह गरे। त्यसैगरी कार्यक्रममा बोल्दै गण्डकी प्रदेशका मुख्यमन्त्री कृष्णचन्द्र नेपाली पोखरेलले गण्डकी प्रदेशमा सत्तापक्ष र प्रतिपक्षबीच द्वन्द्व नभई विशुद्ध राजनीतिक प्रतिस्पर्धा रहेको बताए।
उनले प्रदेशको राजनीति परिपक्व, लोकतान्त्रिक र जनउत्तरदायी भएको उल्लेख गरे।
उनले भने, ‘गण्डकी प्रदेशको राजनीति निकै परिपक्व र लोकतान्त्रिक तथा जनउत्तरदायी छ। हामी सत्तापक्ष र प्रतिपक्षका बीचमा अस्वाभाविक विभेद, द्वन्द्व छैन। हाम्रो बीचमा विशुद्ध राजनीतिक प्रतिस्पर्धा छ। त्यो अत्यन्त मर्यादित र प्रतिफलयुक्त छ भन्ने मलाई लाग्दछ।’
मुख्यमन्त्री पोखरेलले प्रदेश स्थापना भएको छोटो समयमा नै सरकारले जनताको मन जित्न सफल भएको दाबी गरे।
सरकारले गरेका विकास, निर्माण तथा सेवा प्रवाहले प्रदेश सरकारको महत्व जनताले आत्मसात् गरेको उनले बताए। उनले संविधानले प्रदेशलाई दिएको जिम्मेवारी पूरा गर्नका लागि पर्याप्त अधिकार उपयोग गर्न नपाएको पनि बताए।
