राजविराज मेयर कप सप्तरी प्रिमियर लिग अन्तर्गत सोमबार तिलाठी कोइलाडी जायन्टस र टिभीएस किंग्स राजविराज विजयी भएका छन्।
पहिलो खेलमा तिलाठीले बजाज खडक वारियर्सलाई ४ विकेटले हरायो।
खडक वारियर्सले दिएको १०० रनको लक्ष्य तिलाठीले १७.४ ओभरमा ६ विकेट गुमाएर पूरा गर्यो।
तिलाठीका ओपनर आशिष झाले ६५ रन बनाए। उनले ५० बलमा ८ चौका र ३ छक्का प्रहार गरे। कप्तान दिपेन्द्र सिंह ऐरीले १ रन मात्र जोड्न सके।
बलिङमा खडकका भुलावन सहानीले ३ विकेट लिए। अनिल खरेल, विवेक यादव र पवन सर्राफले समान १ विकेट लिए।
टस जितेर ब्याटिङ गरेको खडक वारियर्सले १९.३ ओभरमा ९९ रनमा अलआउट भयो।
उसका लागि अनिल साहले सर्वाधिक २२ रन, कप्तान विवेक यादवले २१ रन, पवन सर्राफ र निरज यादवले समान १४ रन तथा पप्पु यादवले १० रन बनाए।
बलिङमा तिलाठीका आदील अन्सारीले सर्वाधिक ४ विकेट लिए। उनले ३.३ ओभरमा २० रन खर्चिए। राशिद खान र दिपेश कंडेलले समान २ विकेट लिए।
दोश्रो खेलमा टिभीएस किंग्स राजविराजले बोदे बर्साईन थन्डर्सलाई सुपर ओभरमा पराजित गर्यो।
राजविराजले दिएको १५७ रनको लक्ष्य पछ्याउने क्रममा बोदे बर्साईन थन्डर्सले २० ओभरमा ७ विकेट गुमाएर १५६ रन बनाएपछि खेल सुपर ओभरमा पुगेको थियो।
सुपर ओभरमा पहिले ब्याटिङ गरेको बोदे बर्साईनले मात्र ४ रन बनाएको थियो। ५ रनको लक्ष्य टिभीएस किंग्सले ३ बलमा भेटायो।
