बजाज खडक वारियर्स र रुपनी राइडर्स सप्तरीमा जारि तेश्रो संस्करणको राजविराज मेयर कप सप्तरी प्रिमियर लिगको फाइनलमा प्रवेश गरेका छन्।
शुक्रबार प्रतियोगिताको लिग चरणको अन्तिम खेलमा टिभीएस किंग्स राजविराजलाई २७ रनले पराजित गर्दै वारियर्स अंक तालिकाको शीर्षस्थानमा रहँदै फाइनल पुग्न सफल भएको हो।
अंकतालिकामा दोश्रो स्थानमा रहँदै रुपनी राइडर्स फाइनल प्रवेश गर्यो। वारियर्स र राइडर्स दुवैले लिग चरणमा ४ खेल खेल्दा समान ३ जित र १ हार बेहोरे। शनिबार दुई टिम बीच उपाधिको लागि प्रतिस्पर्धा हुनेछ।
राज रंगशालामा सम्पन्न खेलमा वारियर्सले दिएको १८२ रनको लक्ष्य पछ्याउने क्रममा किंग्सले पुरै २० ओभर ब्याटिङ गरेता पनि ७ विकेट क्षतिमा १५४ रन मात्र बनाउन सक्यो।
किंग्सको लागि रोबिन सिंहले अर्धशतकीय योगदान दिने क्रममा २२ बलमा ५ चौका र ४ छक्का प्रहार गर्दै अविजित ५१ रन बनाए। सुरज कुर्मीले ३६ रन, प्रशान्त सिंहले २४ रन तथा सोनु अन्सारीले १६ रन योगदान दिए।
वारियर्सको बलिङमा गोमानंद अमात्य, भुलावन सहानी र अनिल खरेलले समान २ विकेट लिए भने पप्पु यादवले १ विकेट लिए।
यस अघि टस जितेर ब्याटिङ गरेको वारियर्सले निर्धारित २० ओभरमा ४ विकेट क्षेतीमा १८१ रन बनाएको थियो।
वारियर्सको लागि ओपनर अनिल साहले सर्वाधिक ७० रन योगदान दिए जुन क्रममा उनले ४९ बलमा ९ चौका र २ छक्का प्रहार गरे।
कप्तान विवेक यादवले १४ बलमा १ चौका र ५ छक्का प्रहार गर्दै ३७ रन बनाए। निरज यादवले ३२ तथा पवन सर्राफले १८ रन योगदान दिए।
खेलको प्लेयर अफ द म्याच अनिल साह चुनिए।
