प्रधानमन्त्री शेरबहादुर देउवाले १०३ वर्षीय वाङ्मय शताब्दी पुरूष सत्यमोहन जोशीको पार्थिव शरीरलाई नेपालको झन्डा ओढाएर श्रद्धाञ्जली दिएका छन्।
ललितपुर महानगरपालिका परिसरमा राखिएको पार्थिव शरीरमा प्रधानमन्त्री देउवाले नेपालको झन्डा ओढाएका हुन्। उनीसँगै ललितपुर महानगरपालिकाका मेयर चिरिबाबु महर्जनले पनि ओढाएका थिए।
नेकपा माओवादी केन्द्रका अध्यक्ष पुष्पकमल दाहाल, ऊर्जामन्त्री पम्पा भुसाल, पर्यटन मन्त्री जीवनराम श्रेष्ठ लगायत पुगेका थिए।
कलाकार मदनकृष्ण श्रेष्ठले पनि श्रद्धाञ्जली दिएका छन्। उनलाई ललितपुर महानगर परिसरमा अपराह्न ४ बजेसम्म राखिनेछ। त्यसपछि संरक्षण तथा अध्ययनका लागि किष्ट अस्पतालमै फिर्ता लगिनेछ।
यसअघि किष्ट अस्पताल परिसरमा केहीबेर राखिएको थियो।
परिवारका सदस्यहरूले श्रद्धाञ्जली दिएपछि शवलाई अस्पताल परिसरमा राखिएको थियो।
शवलाई जोशीकै इच्छाअनुसार नजलाइने निर्णय भएको हो। बिहान परिवार र अस्पताल प्रशासनबीच भएको छलफलमा उनको शवलाई अस्पतालले संरक्षण गरेर राख्ने भएको हो।
उनको आइतबार बिहान ७ बजेर ९ मिनेट जाँदा निधन भएको हो।
