नेकपा माओवादी केन्द्रका अध्यक्ष पुष्पकमल दाहाल प्रचण्डले गोरखाबाट संसारले देख्ने गरी माओवादीले चुनाव जित्नुपर्ने बताएका छन्।
आज गोरखा-काठमाडौं सम्पर्क समितिले बनस्थलीमा गरेको कार्यक्रममा बोल्दै प्रचण्डले गोरखाबाट संसारमा माओवादी देखिनुपर्ने बताए।
‘माओवादी स्वाट्ट देश र दुनियाँमा देखियोस् क्या गोरखाबाट,’ उनले भने, ‘गोरखाबाट संसारमा माओवादी देखियोस्। अरू ठाउँमा कति जित्छ तपाईंहरू चिन्ता नलिनुस् मैले लिएको छु। म सातै प्रदेशमा गएको छु। संसारलाई गोरखाबाट माओवादी देखाइदिने सङ्कल्प सबैले लिनुपर्यो।’
प्रचण्डले रेकर्डसहित गोरखाबाट चुनाव जित्नुपर्ने बताए। प्रचण्ड गोरखा २ मा सत्ता गठबन्धनबाट साझा उम्मेदवार छन्।
उनले मतदाताको सुरक्षासमेत गर्नुपर्ने बताए।
‘प्रचण्ड गोरखा आउनु भनेको अवसर मात्र होइन बडो झमेला पनि हो,’ उनले भने, ‘उम्मेदवारी दर्ताका दिन बाजा बज्यो। त्यो मेरो योजना थिएन निर्वाचन आयोगले मलाई स्पष्टीकरण सोधेपछि स्पष्टीकरण दिएको छु।’
स्पष्टीकरण चित्तबुझ्दो नभएको भन्दै आयोगले बाजा कहाँबाट आएको खोज्न सिडिओ र निर्वाचन अधिकृतलाई पनि सोधेको प्रचण्डले बताए। आफू गोरखा चुनाव लड्न आएपछि नेता तथा कार्यकर्तामा थप चुनौती थप थपिएको उनले बताएका थिए।
भिडिओ:
