नेपाली कांग्रेसका महामन्त्री गगनकुमार थापाले मतदान गरेका छन्।
महामन्त्री थापाले आज काठमाडौं महानगरपालिका–३० स्थित मैतीदेवी मन्दिर मतदान केन्द्रबाट मतदान गरेका हुन्।
उनी काठमाडौं निर्वाचन क्षेत्र नम्बर–४ बाट प्रतिनिधिसभा सदस्य पदको उम्मेदवार छन्।
मतदानपछि सञ्चारकर्मीहरूसँगको कुराकानीमा महामन्त्री थापाले संवैधानिक व्यवस्था भित्रको चक्र नटुटाउन आग्रह गरे।
उनले प्रधानमन्त्रीका लागि आफूले प्रत्यक्ष संकेत दिएको बताए।
उनले नेपाली कांग्रेसबाहेक अरू कुनै पार्टीमा संसदीय दलका लागि औपचारिकता पनि पूरा नहुने बताए।
महामन्त्री थापाले सांसद चुनिएर गएको भोलिपल्टबाट नै संसदीय दलको निर्वाचनको तयारी गर्ने बताए। उनले ड्राइभिङ सिटमा बसेर कठिनाइलाई पार गर्ने आफ्नो प्रमुख चुनौती रहेको बताए।
उनले भने, ‘यो परोक्ष संकेत होइन। यो प्रत्यक्ष संकेत हो। नेपाली कांग्रेसमा विजयी सांसदबाटै संसदीय दलको नेता चुनिने हो। आजको दिनको यथार्थ के हो भने नेपाली कांग्रेसबाहेक, अरू कुनै पार्टीमा संसदीय दलका लागि औपचारिकता पनि पूरा हुँदैन जस्तो लाग्छ। मैले यो घोषणा गरेको होइन अवस्था बताएको हुँ। आइहालेको अवस्थामा नेपाली कांग्रेस भित्र आउने हो। जहाँ संसदीय दलको निर्वाचन हुन्छ। जहाँ मैले मेरो दाबी प्रस्तुत गरेको छु। दाबी गरेको मात्र होइन, यहाँबाट सांसद भएर गएको भोलिपल्टबाटै संसदीय दलको निर्वाचनको तयारी गर्ने हो, लड्ने हो, जित्ने हो। सोही आधारमा म जान्छु र ड्राइभिङ सिटमा बसेर कठिनालाई पार गर्ने हो भने मेरो संकल्प हो।’
महामन्त्री थापाले काठमाडौं क्षेत्र नम्बर ४ का मतदाताहरू शिक्षित रहेकाले आफ्नो विवेकको प्रयोग गरी मतदान गर्न आग्रह गरे।
