नेकपा (एकीकृत समाजवादी) का सम्मानित नेता झलनाथ खनाल उम्मेदवार रहेको इलाम क्षेत्र नम्बर १ मा प्रतिनिधि सभाको मतपत्र प्रदेश सभाको बाकसमा खसेको छ। करिब सय मतपत्र त्यस्तो पाइएको मुख्य निर्वाचन अधिकृत राजकुमार दाहालले बताए।
‘करिब १ सय प्रतिनिधि सभाको मतपत्र प्रदेश सभाको बाकसमा खसेपछि निकासका लागि हामीले निर्वाचन आयोगकै निर्णय कुर्दैछौं। हामीलाई प्राप्त निर्देशिकाले त्यसबारे कुनै सम्बोधन नगरेपछि आयोगकै निर्णय कुरेका हौँ,’ दाहालले भने।
सर्वदलीय बैठकले भने प्रदेशसभाको बाकसमा खसेको प्रतिनिध सभातर्फको सय भोट प्रदेश सभामै गणना गर्ने सहमति गरेका छन्। निर्वाचन आयोगबाट निर्णय नआउँदा त्यहाँ मतगणनामा ढिलाइ भएको छ। ११ बजेबाट मतगणना सुरू हुने बताइएको छ।
