जिल्लामा अलैँचीका बिरुवाको मूल्य निर्धारण गरिएको छ । नेपाल अलैँची व्यवसायी महासंघ, लमजुङ शाखाले अलैँची बिरुवाको मूल्य निर्धारण गरेको हो।
जिल्लाभर अलैँची बिरुवाको मूल्यमा एकरुपता कायम गर्न महासंघ जिल्ला शाखाको बुधबार बसेको बैठकले बिरुवाको मूल्य निर्धारण गरेको हो । महासंघले प्रतिबिरुवा पाँचदेखि आठसम्म निर्धारण गरेको शाखा अध्यक्ष अजय तामाङले जानकारी दिए।
महासंघ शाखाले पुरानो बोटबाट निकालेको बिरुवाको मूल्य पाँच कायम गरेको छ भने नर्सरीमा ३२ महिना कटेको बिरुवाको मूल्य प्रतिगोटा आठ रुपैयाँ कायम गरेको जनाएको छ।
जिल्लामा अहिले १५ लाख अलैँचीका बिरुवाको माग भएको र २० लाखभन्दा बढी बिरुवा उत्पादन भएको महासंघले जनाएको छ । गत वर्ष प्रतिबिरुवा रु नौ निर्धारण गरिएको भएपनि यस वर्ष अलैँचीको मूल्य र बिरुवाको माग पनि घटेका कारण बिरुवाको मूल्य घटाइएको महासंघले जनाएको छ।
