खसीको मासुलाई प्रतिकिलो १५ सयमा बिक्री गर्ने ललितपुरको एक मासु पसललाई कारवाही गरिएको छ।
चापागाउँमा सञ्चालित शिव कोल्ड स्टोर्सले बढी मूल्यमा मासुको बिक्री वितरण गरेको पाइएकाले दुई लाख रुपैयाँ जरिमाना गरिएको वाणिज्य, आपूर्ति तथा उपभोक्ता संरक्षण विभागले जनाएको छ।
विभागका सूचना अधिकारी रवीन्द्र आचार्यका अनुसार उक्त मासु पसलले बढी मूल्यमा मासु बेचेको र मूल्य सूचीसमेत नराखेको पाइएकाले जरिमाना गरिएको हो।
नियमित बजार अनुगमनका क्रममा शनिबार चापागाउँ दोबाटोमा सञ्चालित प्रतिमा फार्मेसीलाई सर्जिकल मास्क बढी मूल्यमा बिक्री गरेपछि दुई लाख जरिमाना गरिएको हो।
उपभोक्ताबाट प्राप्त गुनासोका आधारमा औषधालयमा अनुगमन गरिएको थियो।
विभागकै कर्मचारीलाई समेत सानो सर्जिकल मास्कको २० लिएको सो औषधालयले खरीद बिलसमेत देखाउन नसकेपछि कारवाही गरिएको जानकारी उनले दिएका छन्।
यसैगरी त्रिपुरेश्वरमा दर्ताविनै सञ्चालन भएको भण्डारी सर्जिकल हाउस र डिल्लीबजारस्थित राजु फ्रेस हाउसलाई पनि कारवाहीस्वरुप पचास-पचास हजार रूपैयाँ जरिमाना गरिएको छ।
उक्त हाउसमा मूल्य सूची नभएको भन्दै जरिमाना गरिएको विभागले बताइएको छ। उपभोक्ता संरक्षण ऐन, २०७५ बमोजिम तिनलाई जरिमाना गरिएको विभागले जनाएको छ।
(रासस)
