गण्डकी प्रदेशका मुख्यमन्त्री पृथ्वीसुब्बा गुरुङले प्रदेश सरकारमाथि अविश्वासको प्रस्ताव पेश भए सामना गरिने बताएका छन्।
नेपाल कम्युनिष्ट पार्टी नेकपाका अगुवा कार्यकर्ता भेला तथा प्रशिक्षणमा उनले केन्द्रमा जे जस्तो विवाद भए पनि प्रदेशभित्र सरकार सञ्चालनमा मिलेर जानुपर्ने पक्षमा आफू रहेको बताए।
गोरखामा शनिबार भएको कार्यक्रममा उनले अविश्वासको प्रस्ताव नै आए सामना गर्नुको विकल्प नरहेको बताए।
प्रचण्ड–माधव समूहलाई केन्द्रमा झगडा भए पनि प्रदेशमा मिल्नुपर्छ भन्दै मिलेर जान आग्रह गरिएको उनको भनाइ छ।
साविकका माओवादी केन्द्र र नेकपा एमाले अलगअलग भएर नै प्रदेशमा सरकार बनाएको भन्दै अरुलाई उदाहरण देखाउन पनि अहिले गण्डकी प्रदेशमा मिलेर जान आग्रह गरिएको मुख्यमन्त्री गुरुङले बताएका छन्।
नेकपामा प्रधानमन्त्री केपी शर्मा ओली र प्रचण्ड-माधव नेपाल समूहले भिन्नभिन्न कार्यक्रम गर्दै आएका छन्।
(रासस)
