नेपाली कांग्रेसका सहमहामन्त्री प्रकाशशरण महतले नेत्रविक्रम चन्द समूह हतियार छाडेर शान्तिपूर्ण बाटोमा आउनु सकारात्मक भएको बताएका छन्।
चितवनमा आज पत्रकारसँग कुरा गर्दै उनले सरकार र सो पार्टीबीच भएको सहमति सकारात्मक भएको टिप्पणी गरे।
उनले भने, ‘मूलधार र शान्तिको बाटोमा आउनु त ठिकै हो। सहमतिमा के कुरा छन् भन्ने चाहिँ हामीलाई थाहा छैन।’
फरक प्रसंगमा उनले प्रतिनिधिसभा बैठक सञ्चालन भएपछि पार्टीले आफ्नो धारणा बनाउने बताउँदै सरकारमा जानुपरेमा आफ्नै नेतृत्वमा मात्रै जाने स्पष्ट पारे।
उनले भने,‘हाम्रो उपस्थितिबिना सरकार बन्न नसक्ने अवस्था बन्यो भने आफ्नै नेतृत्वमा सरकारमा जान्छौं।’
सरकार बनाउन कांग्रेसको आवश्यकता परेमा मात्र सरकारमा जाने उनले स्पष्ट पारे।
नेपाल कम्युनिष्ट पार्टी(नेकपा) विधिवत् रूपमा एकै भएकाले अहिले नै कांग्रेसले धारणा बनाउने बेला नभएको महतको भनाइ थियो। रासस
