नेकपा माओवादी केन्द्रको केन्द्रीय कमिटी बैठक केन्द्रीय कार्यालय पेरिसडाँडामा बसेको छ।
सर्वोच्च अदालतले गत फागुन २३ मा नेकपा (एमाले) र माओवादी केन्द्र ब्यूँताइदिएपछि पहिलो पटक उक्त दलको केन्द्रीय कमिटी बैठक बसेको हो।
बैठकमा पछिल्लो राजनीतिक घटनाक्रम, दलको अवस्था र आगामी दिनमा खेल्ने रणनीतिका बारेमा छलफल भइरहेको पार्टी अध्यक्ष पुष्पकमल दाहाल ‘प्रचण्ड’का प्रेस संयोजक विष्णु सापकोटाले जानकारी दिए।
बैठकमा प्रचण्डले पछिल्लो राजनीतिक अवस्थाबारे जानकारी गराइरहेका छन्।
बैठकमा सरकार गठन र त्यसका लागि दलबीच भइरहेको वार्ता प्रकृयाका विषयमा छलफल भइरहेको सहभागी एक नेताले जानकारी दिए।
उनका अनुसार दलको नाम तथा कम्युनिष्ट पार्टीबीचको एकताको विषयमा समेत बैठकमा छलफल भइरहेको छ।
यसअघि शनिबार बसेको माओवादी केन्द्रको स्थायी कमिटी बैठकले सरकारमा सहभागी मन्त्रीलाई फिर्ता बोलाउने निर्णय गरेको तथा एमाले पार्टी कमिटीमा रहेका नेतालाई स्पष्टीकरण माग्ने निर्णय गरेको थियो।
(रासस)
