टोखा नगरपालिकाले आर्थिक वर्ष २०७८/०७९ को नीति, कार्यक्रम तथा बजेट पारित गरेको छ।
टोखाले असार ९ गते नवौं नगरसभाको पहिलो बैठकमा आव २०७८/०७९ का लागि प्रस्तुत गरेको रु एक अर्ब ८९ करोड ९४ लाख ७६ हजारको बजेट शुक्रबारको दोस्रो बैठमार्फत् पास गरेको हो।
नगरपालिकाका उपप्रमुख ज्ञानमाया डङ्गोलले नगरसभाको दोस्रो बैठकमा पेश गरेको उक्त बजेट नगरप्रमुख प्रकाश अधिकारीले पारित गर्न नगरसभा समक्ष पेश गरेका थिए।
उक्त बजेट बहुमत सदस्यले ताली बजाएसँगै पास भएको हो।
टोखाले आव २०७८/०७९ को बजेटमा स्वास्थ्य, शिक्षा र पूर्वाधारलाई उच्च प्राथमिकतामा राखेको छ। यसबाहेक सामाजिक विकास, पर्यटन प्रवर्द्धन, सांस्कृतिक सम्पदा संरक्षण, कृषिको आधुनिकीकरण, खेलकूदलाई पनि बजेटले प्राथमितामा राखेको छ।
नगरपालिकाले ऐतिहासिक, साँस्कृतिक, पर्यटकीय समृद्ध टोखा नगर भन्ने मूल नाराका साथ समग्र नगरको विकास र समृद्धिका लागि कार्य गरिरहेको छ।
नगरसभाले विनियोजन विधेयक, आर्थिक विधेयक, संगठन संरचना, न्यायिक समितिको प्रतिवेदन लगायत पारित गरेको नगरप्रवक्ता बच्चुराज बस्यालले जानकारी दिए।
काठमाडौंको उत्तरी क्षेत्रमा रहेको टोखामा ११ वडा छन्।
बजेटसभा नेपाली कांग्रेसका जनप्रतिनिधिहरूले भने बहिस्कार गरेका छन्।
बजेट टोखाको समग्र विकासका लागि लक्षित नभई आगामी निर्वाचनलाई प्रभाव पार्नेगरी आएको भन्दै उनीहरूले बहिस्कार गरेका हुन्।
कोरोना महामारीले पीडामा रहेका व्यवसायीलाई करमा ५० प्रतिशत सहुलियत दिनुपर्ने, कोरोना खोप व्यवस्थित रूपमा सञ्चालन गर्नुपर्ने, वडा स्तरीय विनियोजित बजेट बढाउनुपर्नेलगायतका आफ्ना मागलाई सम्बोधन नगरेपछि नगरसभा बहिस्कार गरिएको कांग्रेसको तर्फबाट टोखा–११ मा निर्वाचित वडाध्यक्ष उत्तम अधिकारीले जानकारी दिए।
टोखाको नगरसभामा कांग्रेसको तर्फबाट पाँच जना वडा अध्यक्षसहित २१ नगरसभा सदस्य रहेका छन्।
टोखा वडा नं २ का वडाअध्यक्ष दिपकराज जोशी, वडा नं ३ का वडाअध्यक्ष सिंहराज श्रेष्ठ, वडा नं ६ का वडाअध्यक्ष महेश्वर केसी, वडा नं ८ का वडा अध्यक्ष केशवबहादुर खत्री र वडा नं ११ का वडाअध्यक्ष अधिकारी कांग्रेसका तर्फबाट निर्वाचित जनप्रतिनिधि छन्।
नगरपालिमामा आव २०७७/०७८ मा एक अर्ब ७२ करोडको बजेट विनियोजन भएकामा आव २०७८/०७९ मा उक्त बजेटलाई बढाएर रु एक अर्ब ८९ करोड पुर्याइएको छ।
आव २०७७/०७८ मा सानो आकारको बजेट आउँदा पनि प्रत्येक वडालाई रु दुई करोड ७१ लाख विनियोजन गरिए पनि आव २०७८/०७९ मा उक्त बजेटलाई घटाएर प्रत्येक वडालाई रु दुई करोड ५० लाख वजेट विनियोजन गरेको भन्दै जनप्रतिनिधिहरूले असन्तुष्टि जनाएका हुन्।
‘वडालाई कम बजेट विनियोजन गरेर नगरप्रमुख र उपप्रमुखको तोक आदेशमा बजेट चलाउन खोजेकाले हामीले नगरसभा बहिस्कार गरेका हौं’, वडा अध्यक्ष अधिकारीले भने।
नगरसभामा आफू अल्पमतमा रहेकाले कतिपय बैठकको निर्णय नगरसभामा कार्यपालिका सदस्यलाई थाहा समेत नदिने गरेकोे उनले गुनासो गरे।रासस
