उपराष्ट्रपति नन्दबहादुर पुनले मुलुकमा बढ्दै गएको व्यापार घाटा कम गर्न स्वदेशमै उत्पादन बढाउने किसिमको व्यवसायमा लाग्न उद्योगी व्यवसायीलाई आग्रह गरेका छन्।
नेपाल राष्ट्रिय व्यवसायी महासंघको चौथो साधारणसभा तथा दोस्रो राष्ट्रिय महाधिवेशनको आज उद्घाटन गर्दै उनले मुलुकमा बढ्दै गएको व्यापार घाटा कम गर्दै समृद्ध मुलुक निर्माणका लागि स्वदेशमै उत्पादनमूलक व्यवसाय बढाउनुपर्ने बताए।
‘विदेशी मुलुकबाट आयात गरी व्यवसाय गर्नेतर्फ नभई स्वदेशमै उत्पादन बढाउने किसिमको व्यवसाय गर्नुपर्छ, जसले देशको विकासमा टेवा पुर्याउँछ’, उनले भने।
निर्यात कम हुने र आयात धेरै हुँदा अर्थतन्त्रलाई नकारात्मक असर परेको उनको भनाइ थियो।
संविधानको मर्म र भावनाअनुसार सिंहदरबारको अधिकार गाउँ-गाउँमा पुगे पनि नेपाली जनताको आर्थिक विकासमा अपेक्षाकृत परिवर्तन र पर्याप्त रोजगारीको अवसर बन्न नसकेको उनले बताए।
विसं २०६२/६३ मा भएको राजनीतिक परिवर्तनसँगै सकारात्मक दिशामा अगाडि बढेको देशको अर्थतन्त्र कोरोनाको कारण पुनः चपेटामा परेको उनको भनाइ थियो।
उपराष्ट्रपति पुनले नेपाली पुँजीपतिलाई ढुक्क भएर नेपालमा लगानी गर्नसमेत आग्रह गरे।
‘म नेपाली पुँजीपतिहरूसँग आग्रह गर्न चाहन्छु, पुँजी विदेशमा लैजाने नसोच्नुस्, उल्टो विदेशी पुँजीसमेत नेपालमा भित्र्याउनुहोस्’, उनले भने।
आत्मनिर्भर अर्थतन्त्र बनाउनका लागि सरकार निजी क्षेत्रसँग मिलेर अघि बढ्नुपर्ने उनको भनाइ थियो।
उपराष्ट्रपति पुनले साना तथा मझौला उद्योगी व्यवसायीको समस्या समाधान गर्न सरकारको ध्यानाकर्षणसमेत गरेका छन्।
