मधेस केन्द्रीत दलहरुलाई निर्वाचनमा भाग लिन दबाद दिएको छैन : भारत

सेतोपाटी संवाददाता

काठमाडौँ, असार ३

भारतले मधेस केन्द्रीत दलहरुलाई निर्वाचनमा भाग लिन कुनै दबाब नदिएको जनाएको छ।

भारतीय विदेश मन्त्रालयका प्रवक्ता गोपाल बागलेले नेपालमा रहेका भारतीय राजदूत नेपालको सरकार, राजनीतिक दल र नेताहरुसँग छलफलमा रहेको भएपनि दबाद नदिएको बताएका हुन्।

भारतीय राजदूत मञ्जीभसिंह पुरीले मधेस केन्द्रीत दलहरुलाई स्थानीय तहको निर्वाचनमा भाग लिन दबाब दिएको चर्चाका बीच विदेश मन्त्रालयका प्रवक्तालेत्यसलाई अस्वीकार गरेका हुन्।

उनले भारतको नेपालका सन्दर्भमा धारणा स्पष्ट रहेको दावी गर्दै भने - हामी सँधै सबै राजनीतिक पक्षसँग कुराकानी गर्छौँ। भारतीय राजदूतले कुराकानी गर्छन्। उनी सम्पर्कमा रहन्छन्। उनीहरुले भारतको 'पोजिसन'का आधारमा कुराकानी गर्छन्।'

बागलेले भारतको धारणा अझै पनि समावेशी संविधानको पक्षमा रहेको बताए।

'हामी संविधान कार्यान्वनको प्रक्रियामा सहयोगी छौँ। यस्तो प्रक्रियामा वार्ताका माध्यमबाट सबैपक्षसँगको समझदारीमा सबैलाई साथमा लिनुपर्छ।'

बगालले भारतीय विदेश मन्त्रालयको साप्ताहिक प्रेस ब्रिफिङमा भारतको 'लाइनमा' कुनै परिवर्तन नभएको उल्लेख गरे।

समावेशी संविधानको पहलसरकारले लिएपनि वा सरकार बाहिर रहेका दलहरुले लिएपनि भारतको सहयोग रहने उनले बताए।

'समावेशिकरणको माग अगाडी सार्ने समुहहरुकोप्रक्रियामा सहभागिता र उनीहरुको चाहाना संविधानमा प्रतिबम्बित होस्। भारतको पोजिसन क्लियर छ,' बागलेले भने, 'हाम्रो भूमीका कहिल्यै पनि दबाब दिने होइन। हामी यो गर्नुस् त्यो नगर्नुस् भन्ने कहिल्यै कहिल्यै फलो गरेका छैनौँ।'

उनले नेपालीको सुझावकै आधारमा भारतले वार्ता र संवाद मार्फत सबै नेपालीको आकांक्षा पुरा हुने समावेशी संविधानका लागि सबैलाई साथमा लिन आग्रह गरेको बताए।

प्रकाशित मिति: शनिबार, असार ३, २०७४ १५:३८

सिफारिस