दक्षिण भारतीय सुपरस्टार अभिनेता धनुष यस वर्ष आफ्ना फिल्महरुका कारण वर्षभरि चर्चामा रहे। चाहे त्यो 'कर्नान' होस्, असुरन होस् वा आगामी हलिउड फिल्म 'ग्रे म्यान'।
धनुष हलिउडको फिल्ममा अभिनय गर्ने पहिलो तमिल अभिनेता हुन्। उनले सामाजिक सञ्जाल ट्विटरमा एक करोड फलोअर्स पुग्ने पहिलो तामिल अभिनेताको रेकर्ड पनि बनाइसकेका छन्।
अभिनेता धनुष यतिबेला उनको जनावर प्रेमका कारण खबरमा छाएका छन्। बलिउड लाइफका अनुसार धनुषले हालै दुई नयाँ कुकुर घरमा ल्याएका छन् र सामाजिक सञ्जालमा ती कुकुरहरुको तस्वीर सार्वजनिक गरेका छन्।
तस्बिरमा देखिएका आधारमा बलिउड लाइफले ती कुकुर साइबेरियन हस्की वा अलास्का मालामुट्स जस्तो देखिने लेखेको छ।
रोचक कुरा, ती दुई कुकुरको नाम किंग र कंग हो। दुबैको नाम हलिउड फिल्म 'किंग कंग'बाट प्रेरित छ। कुकुरको नामबाट उनी किंग कंगको फ्यान भएको पनि प्रष्ट भएको छ।
तस्बिरमा हल्का निलो रंगको टिसर्ट र चेक प्यान्ट लगाएका धनुषले ती कुकुरलाई मायालु नजरले हेरिरहेको देखिन्छन्।
हाल धनुष नयाँ फिल्म ‘डी ४३’को सुटिङको तयारीमा छन्। उनको नयाँ प्रोजेक्टमा अक्षय कुमार र सारा अली खानको अभिनय हुने फिल्म ‘अतरंगी रे’ पनि रहेको छ।
