नेपाली राष्ट्रिय टोलीका लेग स्पिनर सन्दीप लामिछाने बिग ब्यास लिगमा बाँकी खेल खेल्न अष्ट्रेलिया आइपुगेका छन्।
युएईविरुद्धको तीन खेलको एकदिवसीय र टी-ट्वान्टी सिरिज सकेर युएईबाटै अष्ट्रेलिया आएका सन्दीप आज मेलबर्न आइपुगेको उनको टिम मेलबर्न स्टार्सले जनाएको छ।
सन्दीपले बिग ब्यासका बाँकी २ लिग खेल खेल्नेछन्।
बिग ब्यासमा ४ खेलबाट ८ विकेट लिँदै सनसनी मच्चाएका लामिछानेले आफू खेल छोडेर बिचमै बंगलादेश गए पनि टोलीको अन्तिम लिग म्याच खेल्न पुनः अस्ट्रेलिया आइपुग्ने बताएका थिए। ‘चार खेलमा मैले सक्दो राम्रो खेल प्रर्दशन गरेँ। अब बंगलादेश लिगमा पनि सोही प्रर्दशन दोहोर्याउने छु, त्यसपछि बिबिएलको अन्तिम लिग तिर अष्ट्रेलिया आउनेछु’ सन्दिपले सेतोपाटीसँग भनेका थिए।
जारी बिग ब्यासमा सन्दीपले चार खेलबाट आठ विकेट लिइसकेका छन्। फेब्रुअरी १८ सम्म चल्ने बिग ब्यासमा समूह चरणको अन्तिम खेल फेब्रुअरी १० मा हुनेछ।
सन्दीपले अब शुक्रबार लिगको १३ औं र आइतबार अन्तिम खेल खेल्नेछन्।
सन्दीपको टीम मेलबर्न स्टार १२ खेलबाट अंक तालिकाको चौथो स्थानमा छ। शीर्ष स्थानमा रहेको होबर्ट ह्युरीक्यान्सको १८ अंक छ भने दोस्रो स्थानमा रहको सिड्नी सिक्सर्सको १६ र समान अंकसहित मेलबर्न रेनेगार्ड तेस्रो स्थानमा छन्।
