अब तीन 'तलाक' भन्दैमा सम्बन्ध विच्छेद नहुने

सेतोपाटी

नयाँ दिल्ली, भदौ ६

मुस्लिम समुदायका पुरुषले विवाह र सम्बन्ध विच्छेदका सम्बन्धमा वर्षौंदेखि गर्दै आएको विवादास्पद निर्णय भारतीय सर्वोच्च अदालतले खारेज गरिदिएको छ।

मुखले 'तलाक' भनेकै भरमा सम्बन्ध विच्छेद गर्ने प्रक्रिया मुस्लिम धर्मग्रन्थ कुरानको मूलतत्त्व विरूद्ध भएको भन्दै सर्वोच्चले यसलाई असंवैधानिक, अमान्य र अवैध मानेको छ।

भारतका उक्त समुदायका पुरुषले तीन पटकसम्म 'तलाक' शब्द भनेपछि श्रीमतीसँग अलग्गिएर सम्बन्ध विच्छेद नै गर्न पाउने धार्मिक मान्यता थियो। पछिल्ला केही वर्षयता त पत्र, फोन, स्काइप, ह्वाट्सएप वा म्यासेजबाट समेत 'तलाक' दिने चलन बढेको थियो।

कानुनी मान्यताकै रुपमा चल्दै आएको यो प्रावधान खारेज भएपछि यसलाई सर्वोच्चको ऐतिहासिक निर्णय भनिएको छ। पाकिस्तान र बंगलादेशमा तीन तलाक चलन खारेज भइसकेको भएपनि भारतमा कायमै थियो।

यस्तो प्रचलन महिला हिंसा नै भएको ठहर गर्दै हिन्दू, मुस्लिम, सिख, क्रिश्चियन र जोरोआस्त्रानियम धर्मका पाँच न्यायाधीशले यो फैसला सुनाएका हुन्।

भारतीय प्रधानमन्त्री नरेन्द्र मोदी ट्वीटरमार्फत यो फैसलाको सरहाना गर्दै अदालतको ऐतिहासिक फैसला भएको बताएका छन्।

प्रकाशित मिति: मंगलबार, भदौ ६, २०७४ १५:१०

सिफारिस