संयुक्त अरब ईमिरेट्स (युएई) को अबुधाबीस्थित नेपाली दूतावास आगामी आईतबार देखि नयाँ ठाउँमा सर्ने भएको छ।
दूतावासले हिजो सोमबार एक सूचना जारी गर्दै अबुधाबीको अल करामा क्षेत्रमा रहेको दूतावास आगामी पुस १५ देखि अल नयन क्षेत्रमा सर्ने जनाएको हो।
हाल दूतावास रहेको अल करामा क्षेत्र अबुधाबीको मुख्य केन्द्रबाट करिब ३ किलोमिटर भित्र पर्छ। यहाँ आईपुग्न सार्वजनिक सवारीसाधनको प्रयोग गरि विभिन्न राज्यबाट आउने सेवाग्राहीले अबुधाबीको मुख्य बस टर्मिनलबाट पुनः ट्याक्सी चढ्नुपर्ने स्थिति थियो। यसबापत सेवाग्राहीले थप अतिरिक्त शुल्क र समयको भार व्यहोर्दै आएका थिए।
सेवाग्राहीको सेवा र सुविधालाई ध्यान दिंदै नेपाल र युएईको परराष्ट्र मन्त्रालयबाट स्वीकृति लिएर नयाँ स्थानमा दूतावास सार्ने निधो गरिएको दूतावासले जनाएको छ। दूतावासको स्थान्तरण पछि कार्यालय प्रयोजनका लागि आवश्यक नयाँ भवनका लागि घरधनीसंग गत आईतबार ५ वर्षको सम्झौता गरिएको नेपाली दूतावासका कार्यवाहक राजदुत सागर फँयालले जानकारी दिए। करिब १० हजार वर्ग्फिट क्षेत्रफलमा फैलिएको दूतावास परिसरमा १८ कोठाको साढे ३ तले भवन , सभा हल र महिला सुरक्षीत आवास गृह रहने फुयाँलले बताए।
नयाँ ठाउँ पुग्न अबुधाबीको मुख्य बस टर्मिनलमा झरेर पूर्वतर्फको आकाशे पुल पार गरी तीनदेखि पाँच मिनेटसम्म हिँड्नुपर्छ। दूतावासको स्थान परिवर्तन गरिएपनि टेलीफोन , ईमेल र फ्याक्स नम्बरहरु यथावत रहने दूतावासले जनाएको छ।
नेपाल र युएई बिच २२ जनवरी १९७७ मा कुटनैतिक संबन्ध स्थापना भएको हो। निर्माण , सुरक्षा , सेवा र व्यवसायिक क्षेत्रमा गरि करिब ४ लाख नेपाली युएईमा कार्यरत रहेको बताईन्छ।
