विश्वव्यापीरूपमा फैलिएको कोरोना भाइरसले गर्दा गरिएको बन्दाबन्दीमा पनि मोबाइलको आयात भइरहेको छ।
चालू आर्थिक वर्ष २०७७/०७८ को पहिलो महिनामा ४ लाख ६७ हजार गोटा मोबाइल सेट आयात भएको छ। सो परिमाणको मोबाइल सेट आयातको लागि देशबाट ४ अर्ब १८ करोड रूपैयाँ बाहिरीएको भन्सार विभागको तथ्याङ्कले देखाएको छ।
गत वर्ष साउनमा ३ लाख ६१ हजार मोबाइल सेट आयात भएको थियो। सो परिमाणको मोबाइल सेट आयातको लागि देशबाट २ अर्ब ४१ करोड रूपैयाँ बाहिरिएको छ।
लकडाउनको समयमा अनलाइन कक्षा र घरमै बसेर कार्यालको काम गर्दा मोबाइलको माग बढेको छ। पछिल्लो समयमा बजारमा मोबाइलको अभाव समेत भएको व्यापारीहरू बताउँछन्।
लकडाउनमा चोरी निकासीको बाटो बन्द भएकोले मोबाइलको आयात बढेको देखिएको मोबाइल आयात संघका अध्यक्ष दीपक मल्होत्राले बताए।
‘चोरी निकासीले ४० प्रतिशत बजार लिएको थियो, त्यो अहिले हामीले पाएका छौं,’ उनले भने।
नेपाली बजारमा विश्वका विभिन्न देशबाट मोबाइल भित्रिने गरेको छ। ती मध्ये चीन, भेइतनाम, भारत लगायतका देशबाट बढी फोन आउने भन्सार विभागको तथ्याङ्क छ।
पछिल्लो समय मोबाइल प्रयोगकर्ता बढ्दै जानाले पनि मोबाइलको आयात बढेको हो। ग्रामीण क्षेत्रसम्म दूरसञ्चार पूर्वाधार तथा सेवा पुग्न थालेपछि विकट क्षेत्रमा पनि मोबाइल सेवाको प्रयोग तीव्ररूपमा भइरहेको छ।
तराईको खुल्ला बोर्डबाट पनि मोबाइल आउने गर्दछ।
‘झिटी, गुण्टा आदेश २०७५’ ले पनि मोबाइलको बजारलाई व्यवस्थित गरेको छ। सो व्यवस्थाअनुसार वैदेशिक यात्रामा गएकाले १ सेट मात्र मोबाइल ल्याउन पाइने छ।
