गणतन्त्रका विरोधीबाट नै
गणतान्त्रिक संविधान हाँकिएको छ
स्वतन्त्रताको हकको खिल्ली उडाउँदै
मण्डलामा जनताको डँडाल्नो भाँचिएको छ
कहिल्यै नछुट्टिने गरी जनतासामु भोकमरी गाँसिएको छ
रोग, भोकले मरिरहेका मान्छेको
राज्यले उल्लासमय मृत्युउत्सव मनाइरहेका बेला
माफ गर संविधान, हामी कसरी तिम्रो जन्मोत्सव मनाउन सक्छौं?
संविधानप्रदत्त मौलिक हकहरू
पलपल लुछिएका छन्
शासकहरू नै कमिसन र भ्रष्टाचारमा मुछिएका छन्।
महंगीले जनता आहात भइरहेका छन्
महामारीमा पनि शासक मुकदर्शक बनिरहेका छन्
जनताको मन जित्नेहरु हारिरहेका बेला
जनताबाट हारेकाहरूले जितिरहेका बेला
राज्यले उल्लासमय बेसारउत्सव मनाइरहेका बेला
माफ गर संविधान, हामी कसरी तिम्रो जन्मोत्सव मनाउन सक्छौं?
शासकको छायाँमा परेर न्याय
धरमर धरमर बनिदिन्छ
हजार रुपैयाँ घुस खाएको आरोपमा
एउटा सामान्य कर्मचारीको स्वाभिमानमाथि
चोट पुर्याइन्छ र आत्महत्या गर्न बाध्य पारिन्छ
अनि मृत्युपछि निर्दोषिताको प्रमाण पत्र दिइन्छ
करोड र अर्बका घोटालाहरू
राज्यको संरक्षणमा गुमनाम पारिन्छ
चाहिएको समय किसानले बिऊ मल पाउँदैनन्
दुखका बेला शासकहरु साथी बन्न आउँदैनन्
बाढीपहिरो पीडित रोइरहेका बेला
जनताले आँसुले शरीर धोइरहेका बेला
शासकहरू प्रत्येक दिन मृत्यु गणना मात्र गरेर बसिरहेका बेला
माफ गर संविधान, हामी कसरी तिम्रो जन्मोत्सव मनाउन सक्छौं?
साग बेच्ने दिदीको ठेला लडाउने
राम्रालाई हैन हाम्रालाई पद चढाउने
कोही भोकै मर्नु पर्दैन भन्दै गफ ठडाउने
हजारौं श्रमिक मजदुरलाई भोकै मराउने
शासकको स्तुतिमा जुट्न पाइने
जनआवाजलाई चुट्न पाइने
ठूला कुर्चीमा बस्नेहरू
जसले जति सक्छ लुट्न पाइने
अपहरण र भ्रष्टाचारका मतियारहरू
सिंहदरबार र बालुवाटारमा लुक्न पाइने
तिम्रो मर्म विपरीत यस्ता कुरा गरिँदै छ
तिम्रो आदर्शमाथि अपराध छरिँदै छ
निर्मलामाथिको न्याय खोसिएका बेला
तिम्रो जन्मोत्सवको पूर्वसन्ध्यामा
अधिकार माग्ने र समाचार बटुल्नेमाथि
प्रहरीका बुट कोचिएका बेला
राज्यले जनतालाई खुच्चिङ गर्दै बसिरहेका बेला
माफ गर संविधान, हामी कसरी तिम्रो जन्मोत्सव मनाउन सक्छौं?
सपना त थियो नि हाम्रो
रगत, पसिना, त्याग र गौरवमय बलिदानले लेखिएका
तिम्रा स्वर्णिम अक्षरहरुलाई व्यवहारमा ढाल्न सकियोस्
उल्लास र उमंगमा रम्दै घरघरमा द्वीप बाल्न सकियोस्
तिम्रै आधार टेकेर पलपलमा समृद्धिका पाइला चाल्न सकियोस्
शुभकामना देऊ संविधान
तिमीलाई नरिवल ठान्नेहरूलाई
तिम्रो स्वाभिमानमाथि घात गर्नेहरूलाई
अब कहिल्यै उठ्न नसक्ने गरी ढाल्न सकियोस्।
अनि मनाउँला है तिम्रो भव्य जन्मोत्सव त्यो बेला
तर यसघडी,
राज्यले जनतालाई बेइमान गर्दै बसिरहेका बेला
माफ गर संविधान, हामी कसरी तिम्रो जन्मोत्सव मनाउन सक्छौं?
