उतार उतार
जनतालाई सडकमै उतार
सिंहदरबारको सिंहासनका लागि
महामहिमहरुको आसनका लागि
जहानीय शासनको लागि
पञ्चायति मण्डलेको लागि
जनता सडकमा नउतारेको भए?
अहो! झापा काण्डमा मान्छे नमारेको भए?
जनआन्दोलनका नाममा
गरिब तथा सीमान्तकृत वर्गका नाममा
जनताको सरकार र जनताकै शासनका नाममा
जंगल जंगलमा मान्छे नघिसारेको भए?
गाउँका हुने खानेका घाँटी नरेटेको भए?
अहो! आज यो व्यवस्था कसरी आउथ्यो?
जनसासन कसरी आउथ्यो?
सुव्यवस्थित प्रशासन कसरी आउथ्यो?
धन्य छ तिमीहरुलाई जनता सडकमा ल्यायौ र पो
पातमा खानेहरु थालमा खाने भयौ
जंगलमा बस्नेहरु दरबारमा बस्ने भयौ
बन्दुक समाउनेहरु कलम समाउने भयौ
दौरा सुरवाल कोट चिटिक्क लाउँदा
आसेपासे सहित सरकारी खर्चमा घुम्न पाउदा
छोरी-ज्वाइँ मन्त्री बनाइ रमाउन पाउदा
कुहेका मृगौला राष्ट्रको ढिकुटीमा फेर्न पाउदा
साँच्चीकै जनताको शासन अनुभूत भए होला
युद्धका घाइतेहरु छट्पटाएको हेर्न पाउदा
प्रजातन्त्र प्रति आस्था राख्नेहरु विचरा
निरुत्साहित भएको हेर्न पाउदा
जिब्रो च्यातिएकालाई मजै आए होला
मृगौलो कुहिएकालाई पनि मजै आए होला
बन्दुकेलाई पनि आनन्दै भए होला
अब नपुगेको को कोलाई हो?
जनता सडकमा उतार
तिमीलाई पनि मजेदार जन शासन
तिमीले चाहे जस्तो प्रशासन
भुडी भोर्ने विधान
चोर्न, कमाउन मिल्ने संविधान
के के चाहिएको छ?
आऊ जनता सडकमा उठाऊ
कांग्रेसका नाममा उठाऊ
कथित माओवादी (ज्युदो भए)
त्यसका नाममा उठाऊ
कथित एमाले (ज्युदो भए)
त्यसका नाममा उठाऊ
प्रजातन्त्र ज्युदो भए
त्यसका नाममा उठाऊ
कम्युनिष्ट ज्युदो भए
त्यसको नाममा उठाऊ
जनता उठाऊ
सडका बोलाऊ
उफार यिनी भेडाहरुलाई
पछार यिनी भेडाहरुलाई
पूरा गर तिम्रा चाहानाहरु
सपनाहरु
अभिलासाहरु
र खोरमा हुल्देऊ यिनी भेडाहरुलाई
र बल्ल प्रजातन्त्रको शासकीय क्षमता वृद्धि हुनेछ
धर्ती खुसी हुनेछ।
चुच्चे नक्साको नाक परै जाला
ग्यास्टीके ग्यास र मोनो रेलका धाक खेरै जाला
त्यसैले उतार जनता सडकमै उतार
सरकार चलाउने हुति भएन?
जनता सडकमा उतार।
जनताले पत्याएनन्?
जनतै सडकमा उतार।
कुर्ची मिलेन जनता उतार।
भाग मिलेन जनता उतार।
प्रिमको पर्दा फाट्यो जनता उतार।
बहुमतको गाड फाट्यो जनता उतार।
प्रजातन्तको प्रजै हरायो
निस्केको चुच्चे नक्साको
चुच्चै हरायो
बन्दुकले ल्याएको गणतन्त्रको
तन्त्रै कहाँ होला?
अब खोज थन्काएको श्रीपेच र लाऊ तिमीहरु नै
तर बिन्ती सडकमा जनतालाई ननचाऊ
नउफार नघिसार अनि नपछार
सिंहदरबारै खायौ, बालुवाटरै खायौ
यो देशको नाम खायौ, निसान खायौ
जनताको पसिना खायौ रगत खायौ
विश्वास खायौ हाम्रो मत खायौ
सरकार खायौ विधान संविधान खायौ
संसद खायौ
अब बाँकी के छ र जनता सडकमा ल्याउछौ?
खोयामा रस सक्कियो चुस्न छाड
जनतालाई सडकमा नचेरी लाउन छाड।
