मानिलिनुस्
यतिबेला शासक गिद्ध बनेको छ
र, चिथोरिरहेको छ- बाँचिरहेको देश।
मानिलिनुस्
यतिबेला सिंहदरबार घाट बनेको छ
भरिएको छ जिउँदा लासहरूले
र, गनाइरहेको छ- सिङ्गो देश।
मानिलिनुस्
हरिस पटाङ्गिएर निस्किए जस्तो
बज्दैछ सत्ताको पट्-पट् विरही धुन
अनौ फुक्लिएर
उछिट्टिए जस्तो उखेलिएको छ- राष्ट्रवादको सिमाना
फाली टुक्रिएर
बुचो बनेको हलो जस्तो
बनेको छ देशको नाप-नक्सा
यो समय
माटोले मात्र देखेको छ- एउटा सपना
अनाजले चुलिएको मानोपाथी, ढाकर र भकारी हेर्ने
तर, यसैबेला पसिनाहरू अनसन बसेको छ।
