अरूको सेवा गरेरै स्वस्थ रहोस् तन
निष्काम कर्मले निर्मल बनोस् मन।
विक्षेप हटोस् मनको ईश्वरोपासनाले।
भगवत् कृपा सबैलाई मिलिरहोस् हरेक दिन।।१।।
अज्ञान हटेर जाओस् स्वस्वरूपको ज्ञान होस्
लोक कल्याण खातिर जीवन समर्पित बनोस्।
दिन पुगोस् सधैँ माग्न कहिल्यै नपरोस्
हुनेखानेले मनैदेखि हुँदाखानेको भरथेग गरोस्।।२।।
तन मन धनले अरूलाई सहयोग गर्न सकियोस्
मुखले रामराम भन्दा बगलीमा छुरा नहोस्।
आवश्यकता कम हुँदै जओस् दायित्व कुनै नरहोस्
जस्तै दुःखमा पनि निराशाले बास नगरोस्।।३।।
व्यापारीले कहिल्यै कालोबजारी नगरोस्
राजनीति र प्रशासनमा भ्रष्टवृत्ति निर्मूल होस्।
भ्रष्टाचार गर्नेको मुखै हेर्दिन भन्दा
चारैतिर भ्रष्टहरूले घेरिन कहिल्यै नपरोस्।।४।।
खाद्यान्न शुद्ध होस् जल निर्मल होस्
वातावरण प्रदुषण मुक्त रहोस्।
ठाउँ ठाउँमा उद्यान बनोस् वृक्षारोपण होस्
प्रकृतिको दोहन बन्द होस्।।५।।
कोरोना कहरमा पनि निराशा नबढोस्
डरै डरमा हरपल मर्न नपरोस्।
विवेक नगुमोस् आशा वर्तमान रहोस्
नयाँ वर्षमा भविष्य उज्ज्वल देख्न सकियोस्।।६।।
मनले सोचेको मात्रै वाणीद्वार अभिव्यक्त होस्
बोलिन्छ जे मुखले त्यसैमा सदा निष्ठा रहोस्।
मन र वाणीमा सधैँ अटुट सामञ्जस्य रहोस्
आशिर्वाद र शुभकामनामा प्रभावी शक्ति होस्।।७।।
नयाँ वर्षमा मेरो पनि सिर्जना केही त नयाँ होस्।
गीत लेखूँ वा कविता पुस्तक सबैलाई प्रीतिकर बनोस्।।
तपाईँको नयाँ वर्ष हरेक दृष्टिले सफल बनोस्
यही शुभकामना दिएँ सबैको जीवन मङ्गलमय बनोस्।।८।।
