पहिलो लकडाउन जे भए नि हावा चाहिएन
काम कुरो ठेगान थेन कामै पाइएन
काम हैन यो पाला चै हावा मागेको
दिनेहरू तर्कि तर्कि किन भागेको?
तरै पनि टुँडिखेला माम बाढिएथ्यो
खान पाए धेरै जनले मन थामिएथ्यो
माम हैन यो पाला चै हावा मागेको
दिनेहरू तर्कि तर्कि किन भागेको?
यस पालाको लकडाउनमा पानी चाहिएन
एक मुठ्ठी सास फेर्न हावा पाइएन
पानी हैन यो पाला चै हावा मागेको
दिनेहरू तर्कि तर्कि किन भागेको?
भौतारिए आफन्त जन सिलिन्डर खोज्दै
बेड छैन, हावा छैन, ढले मृत्युु रोज्दै।
बेड हैन यो पाला चै हावा मागेको
दिनेहरू तर्कि तर्कि किन भागेको?
अस्पतालले हो कि हावा सरकारले दिने?
छैन भन्छ असपताल जिम्मा कस्ले लिने?
सरकार हैन यस पाला चै हावा मागेको
दिनेहरू तर्कि तर्कि किन भागेको?
खोप ल्याउन ढिला भयो पाइएन लाउन
समय मै ल्याको भए थेन दुःख पाउन
खोप हैन, यसपाला चै हावा मागेको
दिनेहरू तर्कि तर्कि किन भागेको?
हिजो सरकार एकमना आज भर छैन
जे हुँदानि जन जनलाई साथ मिल्ने हैन
गाँस, बास, कपास हैन हावा मागेको
दिनेहरू तर्कि तर्कि किन भागेको?
निकालौं है बजेट अहिले सडक चाहिएन
जीवनको रक्षा गरौं खेलवाड पाइएन
बाटो, सडक, बजेट हैन हावा मागेको
दिनेहरू तर्कि तर्कि किन भागेको?
हावा खान पाए हुन्थ्यो अरू केही हैन
हावा नपाई हप्याक हप्याक भनी साध्य छैन
ठूलो कुरा माग्या हो र? हावा मागेको
दिनेहरू तर्कि तर्कि किन भागेको?
