तिम्रा लागि मतपत्र
सत्ता र मन्त्री पदसँग साट्न
मिल्ने एउटा चेक होला
तर देश र नागरिकका लागि
सबथोक हो
सिटामोलको अभावमा सन्तान गुमाएकी
एउटी आमाको आँसु हो
गाउँमा सामान्य प्रसूति सेवा नपाएर
गर्भवती श्रीमती गुमाएको
एक अधवैंशे युवकको पीडा हो
कोशौं टाढाको स्कुल देख्न नपाएर
ज्ञानको छायामा परेको
एउटा अशिक्षित नागरिकको
गुनासो हो
खाडीको पचपन्न डिग्रीको तातोमा
बेल्चा चलाउने एक युवकको
स्वदेशमै रोजगारी पाउने
आशा वा सपना हो
वर्षौंदेखि न्यायको पर्खाइमा
अस्पतालको बेडबाटै अनसनरत
श्रीमानको महाप्रस्थान स्वीकारेर
उही बाटो रोज्न बाध्य गंगामायाको
आशाको दियो हो।
