समय बदलिँदै आयो
खुट्टा भए जुत्ता पाइन्छ
भन्ने दिन गयो
जुत्ता खोज्दै थाकेर नांगै छन्
धेरै खुट्टा
परिवर्तन साँच्चै नै आएको होला
प्रगतिशील बन्नुपर्छ सबैले भन्दै
हिँड्छन् ठिटाहरू बोतलको रातो पानी तान्दै
बाटो साँघुरो पार्ने नै प्रगतिको लक्षण हो जस्तो
संसारको गति यति कस्तो हो कस्तो
बिहे गर छोरा भन्छिन् आमा
छोरो असल छ ठान्छिन् आमा
छोरो अनलाइन प्रेमको प्रेमी
ब्याजसहित लिएर आउँछ रून्छिन आमा
पल्लो घरकी ठुली काकी
कठैबरा दिदी के हो यस्तो गति भन्छिन्
मोबाइलले सक्यो दुनियाँ भन्दै
छोरी हिँडेको गुनासो पोखिन्
स्कुलमा अनलाईन पढ्ने बहाना गर्दै
दामी फोन माग्छ छोरो
खानै पुग्दैन दिनभरीको कमाई
पढ्न छोडेर भाग्छ मोरो
चामल फ्री छ भात खाने किन चाहियो भनेर
खेतिपाती सबैले छोडे
तेल दाल किन्न नसकिने दाम भयो
इम्यूनिटी कताबाट ल्याउने!
सभा समिति गर्छन् नेता
दाम घट्यो भनेर खबर कागजले लेख्छ
धनी मज्जाले खाएर निदाउँछ
गरिब आधा भुँडी नभेटेर जाग्राम बस्छ
कोई पाइखानामा पैसा लुकाएर राखेका
कोई पैसाको निम्ति ढुंगा बोकेर मरेका
कति भुँडीको लागि घर छोडेर बिदेशीने
कति अपच भएर भुँडी घटाउन कुदेका
बदलाव त आएकै हो साथी
मान्छेको आचरणमा हो तर
न घाम बदलिएको छ न हावा
मान्छेको ब्यवहार भएको हो अलग।
