थाहै नपाई सुरु भएको
थाहै नपाई अन्त्य हुने
दुई पाइला बीचको
समय
कति बोझिलो हुन्छ?
घुम्ती, मोड र सिधा बाटोमा।
सिधा हुँदो हो त
अघि बढ्ने थिएन
पछाडि फर्केर हेर्दाहेर्दै
भोगेका नमिठा कहानीहरू
भाग्यको पर्खालमा उभिएर
पाइला टक्क अडिएर
अगाडिका अप्ठ्यारो बाटोहरू
नाप्दा नाप्दै
यथास्थानमै बसिदिन्थ्यो होला
जिन्दगी।
घुम्ती आउनु नै
पाइला चल्ने उत्साह रहेछ
जसले बिर्साउँछ
बितेका बाटोहरू
जसले देखाउँदैन
भविष्यका कैँयन उराठिला
काला पत्थरसम्मको बाँकी यात्रा।
मोडले सिकाएको यात्रामा
दोबाटोले दिएको रोजाइ बोकेर
भिडमा ठक्कर मार्दै
हिँडिरहेछ जिन्दगीको सफरका
सहयात्रीहरू
धमनी र शिराहरू
एउटै बाटोमा बगिदिँदा
मस्तिष्कका सल्कस र गाईरसहरूमा
सोही सिएफएस फ्ल्युड हिँडिदिँदा
न हृदय न मस्तिष्कबाट
हट्नसक्यो
तस्बिर उसको।
