गरिबले खानाको व्यवस्था सुनिश्चित भयो
भनी हौँसिदै बोलेको कुरा
असहाय, अशक्तले सुलभ अनि समयैमै उपचार पाउने
स्वास्थ्य सेवा खोलेको कुरा
सुन्न, पढ्न अनि हेर्न पाउँ, नयाँ वर्षलाई छ अनुरोध
जेहेन्दार छात्राछात्रले शुल्क बिनै
गुणस्तरीय शिक्षा पाएको खबर
युवा भाइबहिनीहरू स्वदेशमै
स्वरोजगार सृजनासँगै रमेको खबर
सुन्न, पढ्न अनि हेर्न पाउँ नयाँ वर्षलाई छ अनुरोध
अन्नदाता किसानहरू माटोमा मिसिएको रगत
पसिनाको मूल्य पाइन्छ भन्दै ढुक्क भएको कुरा
अतिवृष्टि, अनावृष्टि, असिना र दुस्प्रभावबाट
सुरक्षित भई सम्मानपूर्वक बाँचेको कुरा
सुन्न, पढ्न अनि हेर्न पाउँ नयाँ वर्षलाई छ अनुरोध
कर, महसुल, मालपोत तिर्ने नागरिकहरूले
सास्ती बिना काम भयो भनी भनेको कुरा
समयमै सामाजिक सुरक्षा पाउनु पर्नेहरू
मजदुरले ज्यालाको रकम गनी गनी पाएको कुरा
सुन्न, पढ्न अनि हेर्न पाउँ, नयाँ वर्षलाई छ अनुरोध
नाता गोता, वाद, प्रतिवाद बिना
सक्षम, सवल र उत्कृष्ट व्यक्ति चयन भएको कुरा
देशले लिएको लक्ष्य पूरा गर्न
सहकार्य, सद्भाव, सहयोग र हातेमालो भएको कुरा
सुन्न, पढ्न अनि हेर्न पाउँ, नयाँ वर्षलाई छ अनुरोध
जयसिंह धामीहरूले सजिलै भेल तरेको कुरा
निर्मलाहरूका बलात्कारीहरू जेल परेका कुरा
भ्रष्ट्राचारी बहिस्कृत भएका कुरा
दुर्गममा बसि कम्मर कसी सेवा गर्ने पुरस्कृत भएको कुरा
सुन्न, पढ्न अनि हेर्न पाउँ, नयाँ वर्षलाई छ अनुरोध
विपी, पुष्प, गणेश, मनमोहन अनि कृष्ण र मदनको
परिकल्पना साकार भएका कुरा
मेरो देश थिति, विधि पद्धति अनुरुप
सामाजिक न्याय र सद्भावसहित चलेको कुरा
सुन्न, पढ्न अनि हेर्न पाउँ, नयाँ वर्षलाई छ अनुरोध।
