एक जोडी जिन्दगी होस्, एकले अर्कोलाई भर गरोस्
आहा! त्यो जिन्दगी भनेर धेरै जिन्दगीहरूले रहर गरोस्
हावाहुरी चलोस्, पानी परोस् तर जिन्दगी अडिग रहोस्
हिलो छ्यापुन, धुलो फ्याँकुन्, दाग नलाग्दै आफै झरोस्
गहिरो होस्, पहिरो होस् तर जिन्दगीको यात्रा चलिरहोस्
ईर्ष्या गरून्, डाहा गरून् तर तिनकै मन जलिरहोस्
रुख्खा होस्, सुख्खा होस् तर बलियो जिन्दगी दौडिरहोस्
सागर होस्, महासागर होस्, आँटिलो जिन्दगी पौडिरहोस्
दुःख होस्, कष्ट होस् तर जिन्दगी छरपष्ट नहोस्
गरिब होस्, गाउँले होस् तर जिन्दगी भ्रष्ट नहोस्
एक जोडी जिन्दगी होस्, एकले अर्कोलाई भर गरोस्
आहा! त्यो जिन्दगी भनेर धेरै जिन्दगीहरूले रहर गरोस्।
