ढल्न लागेको सम्बन्धलाई जसोतसो ठड्याउन
गरिरहें असफल प्रयास
लागिरहें निरन्तर
झुकिरहें एकोहोरो
स्वीकारीरहें कमजोरी
सहिरहें अवगालहरू
दोष देखाउँदै आफैंलाई
धिक्कारिरहें पटक पटक
र पनि मैले सम्बन्ध जोगाउन सकिनँ
भुलाएर आफैंलाई
बाँचिरहें तिम्रै निम्ति
गरिरहें सम्झौता
मारिरहें रहरहरू
झारिरहें आँसु
घिसारिरहें पीडा
बिर्सिदिँए म पनि मान्छे हुँ
स्वाभिमान दाउमा राखी
गरिरहें क्षमायाचना
र पनि मैले सम्बन्ध जोगाउन सकिनँ
खाइरहें तिम्रो लात्ती
पाइरहें चोटपटक
भुलाइरहें पीडा
दिइरहें माफी
गरिरहें भूल
पूजिरहें देउतासरी
निभाइरहें सम्बन्ध
पिँजडाको चरिसरी
बाँचिरहें अर्थहीन जीवन
बिर्सिदिएँ को हुँ म
सहिरहें सबै चुपचाप
र पनि मैले सम्बन्ध जोगाउन सकिनँ
बचाउन बाबाको मान
गुमाइरहें आत्मसम्मान
गिरिरहें आफ्नै नजरमा
भिजाइरहें परेली
रेटिरहें मुटु
मौनतामै हराएर
चिच्याइरहें भित्रभित्रै
गरिरहें संघर्ष
मरिरहें पलपल
सब ठिक हुन्छ भन्ने विश्वासमा
गरिरहें एकतर्फी कोसिस
र पनि मैले सम्बन्ध जोगाउन सकिनँ
पटक पटक मारिरहें मन
उसलाई जिताउन हारिरहें
थिचेर आफ्नै खुसीहरूको घाँटी
बाँचिरहें मरेर
बाँडिरहें बनावटी हाँसो
छरिरहें विश्वास
भुलाएर आफैंलाई
बनिरहें पत्थर
मुस्कुराइरहें पीडाको आहालमा
भित्रभित्रै आफैंलाई धिक्कारिरहें
र पनि मैले सम्बन्ध जोगाउन सकिनँ
छरछिमेकले के भन्लान्
डराइरहें
सकिनँ साहस जुटाउन
स्वागत गरिरहें भालाहरूलाई दिलमा
दिनेलाई घाउ
गरिरहें बिन्तीभाउ
मानेर नियति
त्यही नर्कलाई स्वीकारीरहें
कसैसँग गरिनँ गुनासो
टाँसेर प्लास्टिकको हाँसो ओठमा
मुस्कुराइरहें
लुटाइरहें स्वाभिमान
र पनि मैले सम्बन्ध जोगाउन सकिनँ
दुनियाँलाई रिझाउन
लागिरहें एकोहोरो
फुलिरहें फूलसरी
छरिरहें सुवास
हरकोहीलाई खुसी पार्न
गरिरहें कोसिस
लागिपरें दिनरात
कुरुप यो जिन्दगीलाई अझै कुरुप पार्न
छ्यापियो तेजाव
नभरिएर मन
जलाइएँ जिउँदै
जलिरहें
माफ गर्नुहोला
र पनि मैले सम्बन्ध जोगाउन सकिनँ।
