मलाई
कुनै दिन प्रिय लाग्थ्यो
त्यो अनुहार!
आजकल
सबैभन्दा धेरै घृणा लाग्छ
त्यही मुहार!
विस्तारै खस्किँदै गए-
अनुहारबाट शालीनता
व्यवहारबाट कुशलता
हृदयबाट संवेदनशीलता
भत्किँदै गए-
आस्थाका धरोहरहरू
भरोसाका पुलहरू
समृद्धिका सपनाहरू!
विस्तारै पखालिँदै गए-
अनुहारबाट कृत्रिम रङ्गहरू
समयसँगै बदलियो रूप
साँगुरिँदै गए-
सम्बन्धका आयामहरू
र मेटिँदै गए
स्मृतिका पानाहरूबाट
बालुवामा कुँदेका
सुन्दर डोबहरू!
