नेपाली कांग्रेसका नेता भीमसेनदास प्रधानले कांग्रेस अधिवेशनमा बागमती प्रदेशको सभापतिमा उम्मेदवारी दिने घोषणा गरेका छन्।
नेता प्रधानले शनिबार काठमाडौंस्थित शान्तिवाटिकामा उम्मेदवारी घोषणा सभा गर्दै बागमती प्रदेशको सभापतिमा उम्मेदवारी दिने घोषणा गरेका हुन्।
उम्मेदवारी घोषणा गर्दै नेता प्रधानले संविधानको मर्म र भावना अनुरूप संघीयताको संस्थागत विकास गराउनका लागि आफूले भूमिका खेल्ने बताए।
संघीयता कार्यान्वयन अन्त्यन्तै फितलो रहेको उल्लेख गर्दै उनले आफू बागमती प्रदेश सभापति भएमा संघीयताको संस्थागत विकासका लागि काम गराउन सक्ने बताए।
उनले भने,‘संघीय संरचना अन्तर्गत संविधानमा तीन तहको सरकारको व्यवस्था गरेको छ। पार्टीको तीन तहको संरचना बनेको छ। त्यसलाई प्रभावकारी ढंगबाट कार्यान्वयन गर्न सक्यो भने पनि एउटा पहिचान बन्छ। यो प्रथम अधिवेशन हो। त्यो ठाउँमा मैले आफ्नो उम्मेदवारी यहाँहरूको शुभेच्छा, सद्भावले पाउन सक्यो भने मैले आफ्नो कार्यदक्षता, आफ्नो भिजन र भोलि आउने दोस्रो पुस्तालाई पनि संघीयताको बारेमा, संघीयताको मर्म र भावनालाई, संविधानको स्प्रिटलाई एउटा संस्थागत रूपमा लाने, संघीयताबारे धेरै प्रश्न उठेको छ।'
उनले थप भने, ‘संघीयता रहन्छ रहँदैन, प्रदेश चाहिन्छ, चाहिँदैन, केन्द्र र प्रदेशको द्वन्द्व, प्रदेश र स्थानीय सरकारको द्वन्द्व यी सबै कुरा संविधानमा व्यवस्था गरेता पनि कानुनी रूपमा साह्रै फितलो कमजोर रहेको कारणले पनि यो कांग्रेसको महाधिवेशनले यी सबै कुराको निर्क्यौल गर्नलाई पनि तह तप्कामा विविध तहमा रहेर काम गर्न सक्यो भने यसको संस्थागत विकासलाई त्यो तहमा बस्न सक्यो भने आफूले केही काम गराउन सक्नेमा मेरो मान्यता छ। त्यसैले मैले त्यसतर्फ मेरो उम्मेदवारीको इच्छा गरेको छु। आकांक्षा जारी गरेको हो।’
उनले प्रदेश भित्रका सबै जिल्लासँग समन्वय गरी बागमती प्रदेशलाई नमूना प्रदेश बनाउने आफ्नो आशय रहेको पनि बताए।
