संस्थापन इतर समूहबाट सभापतिको साझा उम्मेदवार तय गर्न दबाब दिदैँ चाक्सीबारीस्थित नेता प्रकाशमान सिंहको घरमा कांग्रेसका युवा नेताहरुले प्रदर्शन गरेका छन्।
नेपाली कांग्रेसको १४ औं महाधिवेशनमा सभापतिको साझा उम्मेदवार बनाउने सम्बन्धमा संस्थापनइतर समूह नेता सिंहको घरमा बैठक बसिरहेको समयमा मंगलबार साझा उम्मेदवारको विकल्प नभएको भन्दै प्रदर्शन भएको छ।
विभिन्न जिल्लाका महाधिवेशन प्रतिनिधिहरूले प्रदर्शन गरेका हुन्।
प्रदर्शनमा सहभागी नेपाल विद्यार्थी संघका पूर्व सहमहामन्त्री टेकराज पौडेलले कांग्रेसलाई एकतावद्ध बनाएर महाधिवेशनलाई एकताको महाधिवेशन बनाउन माग गर्दै आफूहरुले प्रदर्शन गरेको बताए। नेताहरुले त्याग गरेर भएपनि पार्टीलाई एकतावद्ध बनाएर अगाडि लानुको विकल्प नभएको उनको भनाइ थियो।
प्रदर्शनमा उत्रिएका अर्का महाधिवेशन तथा महासमिति सदस्य राजेन्द्र बजगाईंले सर्वसम्मत रूपमा सभापतिको उम्मेदवार तय गर्न ढिला गर्न नहुने बताए। ‘नेताहरू मिलेर जानुको विकल्प छैन, अहिले नमिले कहिले मिल्ने?,’ बजगाईंले प्रश्न गरे।
