भक्तपुरको सल्लाघारी पूर्व आधा घण्टा परेको मुसलधारे वर्षाले अरनिको राजमार्गमा आएको भेलसँगै ढलभित्र छिरेर हनुमन्ते नदीमा पुगेर वेपत्ता भएका ट्रक चालक अझै भेटिएका छैनन्।
अरनिको राजमार्ग खण्डअन्तर्गत भक्तपुरको चुनदेवीमा आएको भेलको गहिराइ हेर्न गएका सिन्धुली रानीचुरी घर भई हेटौँडा मकवानपुर बस्ने ५७ वर्षीय नरबहादुर राउत वेपत्ता भएको महानगरीय प्रहरी परिसर भक्तपुरका प्रहरी उपरीक्षक सविन प्रधानले जानकारी दिए।
ना६ख १६१६ नंको ट्रकमा हेटौँडाबाट ल्याएको सिमेन्ट सल्लाघारीमा झारेर अरनिको राजमार्गको सर्भिस ट्र्याक हुँदै सूर्यविनायकतर्फ जाने क्रममा चुनदेवी पुगेपछि सडकमा गहिरो छ कि भनेर हेर्न जाँदा उनलाई भेलले हुत्याएर ढलभित्र छिराएर वेपत्ता बनाएको उनले बताए।
सोही ट्रकका सहचालक एवं प्रत्यक्षदर्शी रुपेश सुनारले भने, 'सूर्यविनायक जाने मुख्य सडकमा पनि मोटरसाइकल नै पल्टाउने गरी ठूलो भेल आएको थियो, सर्भिस ट्र्याकमा पनि पानीको भेलले बाटो नै देखिएको थिएन, ट्रक रोकेर ड्राइभर झरेर मुख्य सडक र सर्भिस ट्र्याकको पानी जाने ठाउँमा गहिरो छ कि छैन भनेर हेर्न जाँदा भेलले उहाँलाई हुत्याएर ढलमा हाल्यो, त्यसपछि कहाँ पुगे भेटिएनन्।'
आफ्नै आँखा अगाडि राउतलाई बगाउँदा पनि उद्धार गर्न नसकेपछि प्रहरीलाई खबर गरेको थिएँ।
घटनापछि महानगरीय प्रहरी परिसर भक्तपुर, प्रहरी वृत्त जगाती, नेपाली सेना वीरदल गण सूर्यविनायक, सशस्त्र प्रहरी बल दुवाकोटको प्रमुखसहितको सुरक्षाकर्मीको टोली र अरुण सैँजूलगायत स्वयंसेवकको टोलीले खोजी गरेका थिए।
सुरक्षाकर्मी र स्वयंसेवकको टोली ढलभित्र छिरेर खोलासम्म पुगेर खोजी गरेका थिए। सल्लाघारीका प्रतक्ष्यदर्शीले टाउकोमा चोट लागेको मानिस बगेको देखेको जानकारी दिएका छन्।
सुरक्षाकर्मीको टोलीले हनुमन्ते खोलाको सल्लाघारीदेखि, राधेराधे, जुडीबुटी र नरेफाँट हुँदै ललितपुर र काठमाडौँका खोलामा समेत रातिसम्म खोजी गर्दा पनि नभेटिएको प्रहरी उपरीक्षक प्रधानले बताए।
(रासस)
