घोराही उपमहानगरपालिकाले कोरोना व्यवस्थापनका लागि ८३ लाख रूपैयाँ बराबरको बजेट खर्च गरेको जनाएको छ।
क्वारेन्टिन व्यवस्थापन, कोरोना रोग नियन्त्रण तथा रोकथामका लागि स्वास्थ्य सामग्री खरीद र सीमामा अलपत्र नागरिकलाई घोराहीसम्म ल्याउनका लागि ८३ लाख ४८ हजार ७ सय ०५ रूपैयाँ खर्च भएको उपमहानगरपालिकाले जनाएको छ।
कोरोना राहत कोषमा उपमहानगरपालिकासँगै कर्मचारी, शिक्षक, जनप्रतिनिधिलगायतको ६६ लाख पाँच हजार ९ सय ११ रूपैयाँ जम्मा भएको थियो।
बन्दाबन्दीका समयमा आर्थिक रुपमा विपन्न पाँच हजार ५ सय ४८ परिवारलाई गत वैशाख १५ गतेसम्म १८ लाख १७ हजार रूपैयाँ मूल्य बराबरको खाद्य सामग्री सहयोग गरिएको उपमहानगरपालिका वातावरण तथा विपद् व्यवस्थापन शाखाका प्रमुख उमेश शर्माले जानकारी दिए।
उपमहानगरपालिकाले क्वारेन्टिन व्यवस्थापनमा २७ लाख रूपैयाँभन्दा बढी खर्च गरेको छ।
विदेशबाट आउने नागरिकसँगै देशभित्रका विभिन्न स्थानबाट आउनेलाई राख्नका लागि १९ वटा वडाका ८५ स्थानमा क्वारेन्टिन निर्माणका लागि २७ लाख ६ हजार ४ सय १२ रूपैयाँ खर्च गरिएको छ।
पचासी स्थानमा तीन हजार ४१६ शैया क्षमता रहेको क्वारेन्टिन निर्माण, आवश्यक फर्निचर र कपडालगायत सामग्री खरदमा उक्त रकम खर्च भएको उपमहानगरपालिका, आन्तरिक व्यवस्थापन शाखाका प्रमुख बाबुराम पन्थीले जानकारी दिए।
(रासस)
