अमेरिकाको फुड एन्ड ड्रग एडमिनिस्ट्रेसन (एफडिए) ले सोमबार अल्जाइमर्सका बिरामीले प्रयोग गर्न एउटा औषधीलाई ससर्त अनुमति दिएको छ।
अमेरिकाले एडुहेम नामक उक्त औषधीलाई दिएको अनुमति अल्जाइमर्सको उपचारका लागि ब्रेकथ्रुमात्रै होइन यसले संसारभरि करोडौं मानिसलाई नयाँ आशा देखाएको छ। किनकी पछिल्लो समय मस्तिष्कसम्बन्धी यो रोगले संसारका कुनाकुनामा पीडितलाई मात्र होइन उनीहरूका परिवारलाई पनि निकै पीडा दिएको छ।
यद्द्यपी एफडिएले अनुमति दिएको औषधी अल्जाइमर्सका बिरामीका लागि कति प्रभावकारी छ भन्ने कुरा भने स्पष्ट भइसकेको छैन।
११५ वर्षअघि जर्मन साइकीयाट्रिस्ट अलोइस अल्जाइमरले गरेको एउटा शल्यक्रियाले यो रोग पत्ता लगाउन सघाएको थियो। उनैले पत्ता लगाएको भएर यो रोगलाई अहिले अल्जाइमर्स भनिन्छ।
स्मरण शक्ति गुमाउने विभिन्न कारणमध्ये अल्जाइमर्स एउटा प्रमुख कारण हो।
पछिल्लो समय संसारका विकसित मुलुकहरूमा मानिसहरूको औसत आयु बढेसँगै अल्जाइमर्सको समस्या पनि बढ्दै गएको छ। अल्जाइमर्स भएपछि पीडित र परिवारले भोग्ने पीडा निकै कठिन हुन्छ। मानिसहरूले भोग्ने पीडासँगै ठूलो मात्रामा पैसा पनि खर्च हुन्छ। अहिले संसारभरि हरेक वर्ष १० खर्ब डलर रुपैयाँ यसको उपचारमा खर्च भइरहेको छ भने सन् २०३० सम्म २० खर्ब डलर पुग्ने अनुमान गरिएको छ।
अहिलेको औषधीले बिरामीलाई तत्काल निको बनाउने नभए पनि यसले अल्जाइमर्सलाई थप जटिल बनाउन रोक्ने आशमा धेरैले यसको प्रयोग गर्न सक्नेछन्।
औषधी बनाउने कम्पनी बायोजिनलाई अनुमति दिने पत्रमा एफडिएले अल्जाइमर्सको प्याथोफिजियोलोजीलाई केन्द्रीत गरेर बनाइएको एडुहेम पहिलो उपचार भएको जनाएको छ।
यसअघि सन् २०१९ मा चीनले सांघाईको ग्रिन भ्याली कम्पनीले बनाएको ओलीगोमान्नेत औषधीलाई ससर्त अनुमति दिएको थियो। तर पश्चिमा वैज्ञानिकहरूले चिनियाँ कम्पनीले परीक्षणसम्बन्धी तथ्यांक एकदमै कम देखाएकाले यसको निष्कर्षम विश्वास गर्न नसकिने बताएका थिए।
एफडिएकै प्यानलमा रहेका केही वैज्ञानिकहरूले पनि अहिले पनि एडुहेम औषधीलाई अनुमति दिन नहुने बताएका थिए।
औषधी बनाउने कम्पनी बायोजिनले पनि सुरूमा गरेको ट्रायलमा यो औषधीले काम नगरेको बताएको थियो। पछि अर्को ट्रायल गरेर हाइडोजमा दिए काम गर्ने पुष्टि भएको भन्दै अनुमति मागेको थियो।
एफडिएले तुरून्तै अर्को ट्रायल गर्ने सर्तमा अहिलेलाई अनुमति दिएको हो।
