खेत जोतेर फर्कंदै गर्दा लडेर गोरखामा एक जनाको मृत्यु भएको छ।
जिल्लाको शहीद लखन गाउँपालिका-८ का ३९ वर्षीय कुमार श्रेष्ठको लडेर मृत्यु भएको वडाध्यक्ष काशीनाथ अंगाईले जानकारी दिए। श्रेष्ठ भीमसेन थापा गाउँपालिका-६ अश्राङमा पर्ने स्थानीय ज्याँदुलखोला फाँटमा खेत जोतेर घर फर्किंदै थिए।
शारीरिक अपांगता भएका बुवासँगै खेत जोतेर घर फर्कंदै गर्दा लडेर मृत्यु भएका श्रेष्ठको अनुहारमा चोट देखिएको वडाध्यक्ष अंगाईले जानकारी दिए।
मंगलबार साँझ उक्त घटना भएको उनले बताए।
खेत जोत्दाजोत्दै चर्को घाम भएपछि गोरु फुकाएर बुवाले चराउन लगेपछि उनी घर फर्कने क्रममा खोलाको दलदलेमा खुट्टा अड्किएर लड्दा मृत्यु भएको अनुमान गरिएको वडाध्यक्ष अंगाईले जानकारी दिए।
घटनाको खबर प्राप्त भएलगत्तै बुङ्कोट प्रहरी चौकीबाट प्रहरी सहायक निरीक्षक सन्तोष अधिकारीको टोली घटनास्थल पुगेको थियो। मृतकको शव गोरखा अस्पतालमा ल्याएर परीक्षणपछि आज परिवारलाई बुझाउने तयारी भइरहेको उनले बताए। रासस
