पाँचपोखरी थाङ्पाल गाउँपालिका–८ लाँगर्चे इन्द्रावती तेस्रो जलविद्युत् आयोजनाको ड्यामसाइटमा ठूलो पहिरो गएको छ।
गएराति ९ बजे गएको पहिरामा एउटा मोटरसाइकल पुरिएको छ भने मानवीय क्षति भने नभएको स्थानीयबासी राजन भुजेलले जानकारी दिए।
अहिले पनि पहिरो निरन्तर खसिरहेकाले जोखिम रहेको जलविद्युत् आयोजनाका प्रमुख मानोलक श्रेष्ठले जानकारी दिए।
निरन्तरको वर्षापछि आएको पहिराले मेलम्ची भेताङ्ग जोड्ने मोटरबाटोमा पनि क्षति पुगेको छ।
यस क्षेत्रमा पैदल हिँड्नसमेत अति डरमर्दो अवस्था रहेको भुजेलले बताए।
असार १ र त्यसपछिका बाढीपहिराले यस सडकमा यातायातका साधन चलेका छैनन्। पहिरो ठूलो भएको, पुल बगाएको तथा जताततै सडक क्षति भएकाले मर्मतमा समस्या भएको गाउँपालिकाले जनाएको छ। रासस
