स्वास्थ्य तथा जनसंख्या मन्त्रालयले कोभिड-१९ को परीक्षणको नक्कली रिपोर्ट बनाइदिएको आरोपमा शहीद गंगालाल हृदय रोग केन्द्र कर्मचारीमाथि छानबिन सुरू गरेको छ।
मन्त्रालयले केन्द्रको प्रयोगशालामा काम गर्ने वरिष्ठ ल्याब टेक्निसियन विनोदकुमार यादवमाथि कोभिड-१९ को नक्कली रिपोर्ट बनाएको आरोपमा छानबिन सुरू गरेको हो।
सर्वसाधारणले उजुरी दिएपछि मन्त्रालयले छानबिन प्रक्रिया थालेको हो।
मन्त्रालयले केन्द्रका सञ्चालक समिति विजय राई संयोजक र मन्त्रालयका उपसचिव मानबहादुर बस्नेत र राष्ट्रिय जनस्वास्थ्य प्रयोगशालाका विज्ञ डा शङ्कर काफ्ले सदस्य रहेको तीन सदस्यीय छानबिन समिति गठन गरिएको छ।
मन्त्रालयका उपसचिव बस्नेतले यादवले कोभिड-१९ को नक्कली रिपोर्ट बनाई सर्वसाधारणसँग रकम असुल्ने गरेको बताए।
यादवले नक्कली कागजात बनाउने, केन्द्रको लेटरप्याडको दुरूपयोग गर्ने, बिना परीक्षण रिपोर्ट निकाल्ने गरेको पाइएको उनले जानकारी दिए।
‘केन्द्रको ल्याब कक्षमा बसेर नक्कली रिपोर्ट बनाउनका लागि बार्गेनिङ गर्ने गरेको पनि पाइयो’, उनले भने, ‘स्वाबको परीक्षण नगरिकन यादवले रिपोर्ट बनाउने गरेको देखियो।’
उपसचिव बस्नेतका अनुसार विदेश जानेको संक्रमण देखिए यादवले रकम लिएर रिपोर्टलाई नेगेटिभ पनि बनाउनेसमेत गरेको पाइएको छ।
यादवलाई यसअघि पनि पटक-पटक स्पष्टीकरण सोधिएको उनले जानकारी दिए।
यादवलाई गंगालालको सेवा सर्त नियमावली अनुसार भविष्यमा हृदय रोग केन्दको सेवामा अयोग्य ठहर गर्दै बर्खास्त गर्ने गरी विभागीय सजाय गर्न सञ्चालक समितिलाई सिफारिस गरिएको छ। रासस
