प्रकृतिका कुचिकारका रूपमा रहेका गिद्धको संख्या बढ्न थालेपछि संरक्षणकर्मी निकै उत्साहित भएका छन्।
संरक्षण र जनचेतनाको प्रभावका कारण जिल्लामा लोपोन्मुख अवस्थामा पुगेका गिद्धको संख्या उल्लेख्य रूपमा वृद्धि भएको छ। सन् २०१० मा यहाँ एकमात्रै गुँड फेला परेकामा हाल गिद्धका ५० गुँड फेला परेका छन्।
'गुँड बढी देखिनुलाई सकारात्मकरूपमा लिन सकिन्छ', नेपाल पंक्षी संरक्षण संघका संरक्षणकर्मी हिरुलाल चौधरीले भने, 'नाटकीयरूपमा ९० प्रतिशत बढीले दुई दशकअघि कमी आएको गिद्धको संख्यामा वृद्धि हुन थालेपछि निकै उत्साहित भएका छौं।'
पाँचदेखि १० को संख्यामा रहेका गिद्धको संख्या बढेर हाल २०० बढीको हाराहारी पुगेका छन्।
चौपायाको दुखाइ कम गर्न प्रयोग गरिने डाइक्लोफेनेक औषधिको प्रयोगमा लागेको प्रतिबन्धले गिद्धको संख्यामा बढोत्तरी भएको बताइएको छ।
डाइक्लोफेनेक औषधिको प्रयोगपश्चात मरेका चौपायाको मासु गिद्धले खाँदा गिद्ध हृदयघात भई मर्ने गरेका थिए।
नेपालसहित बंगलादेश, भारत र पाकिस्तानमा गरिएको अध्ययनअनुसार गिद्धको संख्यामा ह्रास आउनाको मुख्य कारण पशुको उपचारमा प्रयोग गरिने डाइक्लोफेनेक औषधि भएको पुष्टि भएपछि यसको प्रयोगमा प्रतिबन्ध लगाइएको हो।
'गिद्धलाई डाइक्लोफेनेक औषधि प्रयोग गरिएको आहारबाट रोक्नु निकै चुनौती थियो', संरक्षणकर्मी उनले भने, 'डाइक्लोफेनेक औषधिको प्रयोगमा पूर्णरूपमा प्रतिबन्ध लगाउनका लागि निकै प्रयास भए, त्यसको परिणमस्वरूप औषधिमा प्रतिबन्ध लागेपछि गिद्ध संरक्षणमा टेवा पुगेको छ।'
डाइक्लोफेनेक औषधिको विकल्पका रूपमा हाल गिद्धलाई असर नपुग्ने अरू औषधिको प्रयोग हुन थालेको छ।
गिद्धको बासस्थानमा सुधारसँगै वातावरणमा पार्ने प्रभावलाई न्यूनीकरण गर्नेबारे जनचेतना फैलाउने कार्य र गिद्धले गुँड बनाउने रुखहरुको संरक्षणमा जोड दिइएपछि गिद्धलाई पुरानै अवस्थामा फर्काउने कार्य सन्तोषजनकरूपमा अगाडि बढ्दै आएको छ।
शुक्लाफाँटा राष्ट्रिय निकुञ्जको घाँसेमैदान, झिलमिला, तारापुर, भतपुरी फाँटा, बर्निखेडा, लालपानी क्षेत्रमा गिद्धको बासस्थान रहेको छ।
निकुञ्जसँगै त्यसको मध्यवर्ती क्षेत्रका रूपमा रहेका दोधारा चाँदनी, बन्साहा र लालझाडी क्षेत्रमा समेत गिद्धले गुँड लगाउने गरेको छ।
निकुञ्जका सूचना अधिकारी रविन चौधरीका अनुसार नेपालमा पाइने नौ प्रजातिका गिद्धमध्ये यहाँ सात प्रजातिका गिद्ध पाइने गरेका छन्। जसमा डङ्गर, हिमाली, सानो खैरो, सुन, खैरो, राज र गोब्रे गिद्धका प्रजाति पाइने गरेका छन्।
'सबभन्दा बढी डङ्गर गिद्धको संख्या देखापरेको छ', उनले भने, 'त्यसपछि सुनगिद्ध र सानो खैरो गिद्धको संख्या देखिएको छ, अन्यको संख्या धेरै कम छ, लामो ठुडे र खैरो गिद्ध जाडो मौसममा मात्रै देखापर्ने गरेको छ, ती दुई प्रजातिका गिद्ध बाह्य क्षेत्रबाट ‘माइग्रेट’ भएर यहाँ आइपुग्ने गरेका छन्।'
निकुञ्जमा पाइने गिद्धका प्रजातिमध्ये चार प्रजातिलाई निकै दुर्लभ मानिएको छ।
गिद्धको प्रजननदर बढ्दै गएकाले त्यसलाई सकारात्मकरूपमा लिन सकिने चौधरीले बताए।
कैलालीको खुटिया, अत्तरिया, बेली, पटेलालगायतका क्षेत्रमा गिद्ध पाइने गरेका छन्।
गिद्ध संरक्षणकर्मीका अनुसार कैलालीमा गिद्धको संख्या १५० को हाराहारीमा छन्। सुदूरपश्चिमका पहाडी क्षेत्रमा पाइने सुनगिद्ध र राजगिद्ध जोगाउनका लागिसमेत निकै चुनौती छ।
मुख्य समस्याका रूपमा आगलागी रहेको छ। गिद्धले लगाएका गुँड प्रतिवर्ष आगलागीका कारण जल्ने गरेका छन्। त्यसबाट गिद्धको संख्यामा निकै कमी आएको छ। आगलागी नियन्त्रण गर्न सकिएमात्रै गिद्धलाई लोप हुनबाट जोगाउन सकिने संरक्षणकर्मीको भनाइ छ।
गिद्ध मांसहारी चरा भए पनि त्यसले आफैं सिकार भने गर्दैन। मरेका पशु गिद्धको मुख्य आहाराका रूपमा रहेको छ।
वातावरण सन्तुलन गर्नमा गिद्धको महत्वपूर्ण भूमिका छ। आहाराका लागि गिद्ध टाढा–टाढासम्म उड्ने गर्दछ। विश्वमा गिद्धका २३ प्रजाति पाइने गरेका छन्।
गिद्ध दिवस मनाइँदै
शुक्लाफाँटा राष्ट्रिय निकुञ्जमा आज अन्तर्राष्ट्रिय सचेतना गिद्ध दिवस मनाइँदै छ।
प्रत्येक वर्षको सेप्टेम्बर ३ तारिखका दिन दिवस मनाइने गरिएको छ।
निकुञ्ज कार्यालय, नेपाली सेना, एनटिएनसी, मध्यवर्ती समितिलगायतको सहभागितामा गिद्ध जोगाउनका लागि जनचेतना फैलाउनेजस्ता कार्यक्रम आयोजना गरिएको निकुञ्जका सूचना अधिकारी चौधरीले बताए।
उनका अनुसार गिद्ध पाइने ठाउँ पत्ता लगाई संख्या यकिन गर्ने र गुँड पत्ता लगाउने कार्यसमेत अगाडि बढाइएको छ। वाइनाकुलरको सहायताले हेड काउन्टका आधारमा संख्या पत्ता लगाइने उनले बताए। त्यसका लागि निकुञ्ज र मध्यवर्ती क्षेत्रमा टोली परिचालन गरिएको छ। (रासस)
