सप्तरीको राजविराज नगरपालिकामा एक महिलाको हत्यामा संलग्न उनका देवर र देउरानीलाई जन्मकैदको सजाय भएको छ।
राजविराज-१५ मुसहर्नियाकी २४ वर्षीया बेचनीदेवी साहको हत्यामा संलग्न ३५ वर्षीय पञ्चदेव र उनकी श्रीमती ३१ वर्षीया प्रमिलादेवीई जिल्ला अदालतले जन्मकैदको सजाय सुनाएको हो।
न्यायाधीश ऋषिराम आचार्यको एकल इजलासले साह दम्पतीलाई उक्त सजायको फैसला गरेको हो।
यस्तै, हत्यामा संलग्न प्रमिलाका भाइ डाक्नेश्वरी नगरपालिका–७ ब्रह्मपुरका ३६ वर्षीय सत्यनारायण साहलाई समेत अदालतले तीन वर्ष कैदको फैसला गरेको छ।
अदालतले राजविराज नगरपालिका–१५ मुसहर्नियाका २४ वर्षीय धर्मेन्द्र साह र ३५ वर्षीय जिवछनारायण साहलाई भने सो घटनामा सफाइ दिएको छ।
साह दम्पतीका छोरा १६ वर्षीय सन्तोष, हत्या गरिएकी बेचनीदेवीकी सासू ५५ वर्षीया शोमादेवी, सोही ठाउँका ३५ वर्षीय जयनारायण साह, ५० वर्षीय ताराचन्द्र साह, ६४ वर्षीय गोपी साह, नन्दी मण्डल र ६३ वर्षीय चलितर साहको हकमा मुद्दा मुल्तबीमा राखिएको अदालतका सूचना अधिकारी हेमबहादुर बुढाथोकीले जानकारी दिए।
बेचनीदेवीको शव २०७५ जेठ ३१ गते उनकै घरको शौचालयको सेप्टिक ट्यांकीमा फेला परेको थियो। बेचनीदेवीका बुवा रामकुमारले २०७६ असार ६ गते जिल्ला प्रहरी कार्यालयमा उजुरी दिएका थिए। रासस
