रोल्पामा आइतबार बिहान भएको पिकअप जीप दुर्घटनामा परि चालकसहित तीन जनाको घटनास्थलमै मृत्यु भएको छ।
रोल्पाका प्रहरी प्रमुख डिएसपी नरेशराज सुवेदीका अनुसार मृतकहरूमा ५१ वर्षिय सवारी चालक रूद्र घर्तिमगर, ५३ वर्षिय टेकप्रसाद पुन र ४७ वर्षिय चौसरा विक छन्।
तीन जना घाइतेलाई उद्धार गरि अस्पताल पुर्याइएको डिएसपी सुवेदीले सेतोपाटीलाई जानकारी दिए। घाइतेहरूमा २१ वर्षिया बिना घर्तिमगर, १८ वर्षिया लीला पुनमगर र ६१ वर्षिया पञ्चना विक छन्।
जीपमा ६ यात्रु भएको आशंका भइरहेको सुबेदीले बताए। ‘दुर्घटनास्थल निकै भिरालो छ,’ सुवेदीले भने, ‘तैपनि प्रहरीले अरू पनि दुर्घटनास्थलमा छन् कि भनेर खोजी गरिरहेको छ।’
डिएसपी सुवेदीका अनुसार रोल्पाको माडी गाउँपालिका वडा नं. ६ हान्निङ भन्ने ठाउँबाट घर्ती गाउँतर्फ जाँदै गरेको यात्रुबाहक पिकअप जीप बिहान ११ बजेतिर दुर्घटनामा परेको थियो। दुर्घटनाको कारण खुलेको छैन।
मृतक र घाइते सबै माडी ६ रोल्पाकै स्थानीय हुन्।
‘दुर्घटनास्थल भिरालो र मोडहरूसहितको छ,’ उनले भने ‘ब्रेक फेल भएर दुर्घटना भएको अनुमान भइरहेको छ।’
जीप अझैं भिरमै अड्किएको अवस्थामा रहेको छ। जीप साढे ३ सय मिटर तल खसेको डिएसपी सुबेदीले जानकारी दिए ।
