तनहुँको शुक्लागण्डकी नगरपालिकामा खेर गएको प्लाष्टिक उपयोग गरी सडक निर्माण गरिएको छ।
शुक्लागण्डकी नगरपालिका-७ सेराटारमा स्थानीयस्तरमा जम्मा गरिएको प्लास्टिक प्रयोग गरी सडक निर्माण गरिएको व्यवस्थापन केन्द्रका प्राविधिक विमल बाँस्तोलाले जानकारी दिए।
नगरपालिका-७ सेराटारस्थित सूर्य नेपाल प्रालिको आर्थिक सहयोग एवंं पोखरास्थित ग्रिन रोड फोहोर व्यवस्थापन प्रालिले प्राविधिक सहयोग गरेको थियो।
उक्त सडक ३३० मिटर लामो छ भने सडकको चौडाइ साढे तीन मिटर छ। सो कार्यका लागि ६०० केजी प्लास्टिक प्रयोग भएको बाँस्तोलाले जानकारी दिए।
उक्त प्लास्टिक सेराटारका बासिन्दा र केही नगरपालिकाको फोहरमैला फाल्ने स्थानबाट संकलन गरी ल्याइएको हझ
सडक निर्माणमा प्रयोग गरिएको प्लास्टिकले १० प्रतिशत अलकत्राको प्रयोग घटाउने बाँस्तोलाले बताए।
पुनः प्रयोग गर्न नमिल्ने प्लास्टिकलाई सफा गरी आवश्यक तापक्रममा राखेर अलकत्रासँग मिसाएर प्रयोग गरिएको हो। केही महिनाअघि सूर्य नेपालको सहयोगमा प्लास्टिक जम्मा गर्न तालिम प्रदान गरी स्थानीय बासिन्दालाई प्लास्टिक जम्मा गर्न लगाइएको थियो।
सडकमा प्लास्टिक प्रयोग भएपछि पानीले सडक चाँडो नबिग्रिने, अलकत्राको प्रयोग कम हुने र आयात घट्ने व्यवस्थापन केन्द्रका प्राविधिक विमल बाँस्तोलाले जानकारी दिए। सडकका सबै संरचना निर्माणका लागि सूर्य नेपालले ४९ लाख रूपैयाँ र नगरपालिकाको तीन लाख रुपैयाँ लगानी गरेको बताइएको छ।
