स्रोत नखुलेको ३९ लाख ५० हजार पाँच सय रूपैयाँ नगदसहित नेपाल प्रहरीले एक जनालाई पक्राउ गरेको छ।
प्रहरी प्रभाग नागढुंगाको टोलीले धादिङबाट काठमाडौं आउँदै गरेको ना ४ ख ९६७४ नम्बरको बसबाट नवलपरासी बर्दघाट नगरपालिका वडा नम्बर ६ का २२ वर्षीय टिकाराम भट्टराईलाई पक्राउ गरेको हो।
टिकारामलाई प्रहरीले शनिबार सार्वजनिक गरेको हो।
जिल्ला प्रहरी परिसर काठमाडौंका प्रवक्ता, प्रहरी उपरीक्षक दिनेशराज मैनालीका अनुसार हरियो रङको झोलाभित्र रहेको रकमसहित भट्टराई पक्राउ परेका हुन्।
भट्टराईबाट प्रहरीले झोला, नगद र एकथान मोबाइल बरामद गरेको छ। भट्टराईलाई प्रहरी वृत्त थानकोटबाट आवश्यक अनुसन्धान भइरहेको प्रवक्ता मैनालीले जानकारी दिए।
