ओखलढुंगाको रमाइलो डाँडामा ट्रकको ठक्करबाट एक युवकको मृत्यु भएको छ। ट्रकको ठक्करबाट गम्भीर घाइते भएका मोलुङ गाउँपालिका–८ माँझखर्कका २६ वर्षीय फुरी शेर्पाको शुक्रबार मृत्यु भएको हो।
जिल्लाको सिद्धिचरण नगरपालिका–११ रमाइलोडाँडामा मिलनचोकबाट आएर साइड लगाउने क्रममा ना२ख ८७७९ नम्बरको ट्रकले बिहीबार शेर्पालाई ठक्कर दिएको थियो। गम्भीर घाइते भएका उनलाई उपचारका लागि तत्काल ओखलढुंगा सामुदायिक अस्पताल लगिएको थियो।
जिल्लामा उपचार सम्भव नहुने भएपछि अस्पतालले काठमाडौं पठाएको थियो।
उपचारका लागि काठमाडौं लैजाने क्रममै उनको मृत्यु भएको जिल्ला प्रहरी कार्यालय ओखलढुंगाका प्रहरी निरीक्षक केशव अधिकारीले जानकारी दिए। प्रहरीले शव परीक्षणका लागि जिल्ला अस्पताल रुम्जाटार पठाएको छ।
ट्रक चालक सिद्धिचरण नगरपालिका–९ ज्यामिरेका राजकुमार श्रेष्ठ र ट्रक नियन्त्रणमा लिइएको पनि अधिकारीले बताए।
