उत्तरी गोरखाको मनास्लु हिमालको आधार शिविरमा सोमबार गएको हिमपहिरामा परी मृत्यु भएका संखुवासभाका ३४ वर्षीय अनुप राईको शव हेलिकप्टरमा मंगलबार काठमाडौं लगिएको छ।
लामो प्रयासपछि राईको शव हेलिकप्टरमार्फत राजधानी पठाइएको जिल्ला प्रहरी कार्यालयका प्रहरी नायब उपरीक्षक लिलाराज लामिछानेले जानकारी दिए।
मौसममा सुधार आएपछि राईको शव हेलिकप्टरमा काठमाडाैं लैजान सहज भएको हो।
खोँचमा रहेको शव निकाल्न दिनभर प्रयास गरिएको थियो।
'मौसम प्रतिकूलताका कारण हेलिकप्टर हिमपहिरो गएको ठाउँमा पुग्न कठिन भएको थियो। साँझपख मौसममा सुधार आएपछि शव हिउँबाट निकाल्न सहज भएको हो,' लामिछानेले भने।
राईको शव सामागाउँ ल्याई मुचुल्का तयार पारेर काठमाडौं पठाइएको उनले बताए।
महाराजगञ्जस्थित त्रिवि शिक्षण अस्पतालमा शव परीक्षणपछि अन्त्येष्टिका लागि परिवारको जिम्मा लगाइने प्रहरीले जनाएको छ।
मनास्लु आधार शिविरमा सोमबार गएको हिमपहिरामा परेर १३ जना बेपत्ता भएका थिए। बेपत्तामध्ये १२ जनाको सकुशल उद्धार गरिएको थियो। राईलाई भने बचाउन सकिएको थिएन।
