मोन्टेनेग्रोलाई ७-० को विशाल अन्तरले पराजित गर्दै इङ्ल्याण्ड युरोकप-२०२० मा छनौट भएको छ।
समूह 'ए' अन्तरगत बिहीबार राती भएको खेलमा कप्तान ह्यारी केनले ह्याट्रिक गरे। उनले खेलको १८, २४ र ३७ औं मिनेटमा गोल गर्दै आफ्नो ह्याट्रिक पूरा गरेका हुन्।
त्यस्तै इङ्ल्याण्डका लागि एलेक्स अक्सलेड चेम्वरलेन, मार्कुस रासफोर्ड र टम्मी अब्राहमले गोल गरे। उनीहरूले क्रमशः खेलको ११, ३० तथा ८४ औं मिनेटमा गरेका हुन्।
यस्तै खेलको ६६ औं मिनेटमा मोन्टेनेग्रोका एलेक्ससान्दर सो फ्रान्सले आत्मघाती गोल गरेका थिए।
यस जितसँगै इङ्ल्याण्ड एक खेल बाँकी छँदै १८ जोड्दै युरोकपका लागि छनौट भएको छ। अब उसले कोसोभोसँग एक खेल खेल्न बाँकी छ।
